Ֆրանսիայի Սենատում կաշառման առաջին փորձը

Ստեղծվել է Սենատում Հայոց ցեղասպանության օրինագծին դեմ քվեարկողների պարգևատրման հիմանդրամ:

Ինչպես տեղեկացնում է թուրքական Ջիհան գործակալությունը, ազգությամբ ալժիրցի Ֆրանսիայի գործարար Ռաշիդ Նեկկազը հունվարի 21-ին հայտարարել է, որ իր միջոցներով ստեղծվել է հունվարի 23-ին Ֆրանսիայի Սենատում Հայոց ցեղասպանության ժխտումը քրեականացնող օրինագծին դեմ քվեարկած սենատորների պարգևատրման հիմնադրամ:

Այն սենատորները, որոնք համարձակություն կունենան դեմ քվեարկել օրինագծին, կստանան դրամական մրցանակ «Հարմարձակության համար պարգև» անվան տակ: Սա ոչ այլ ինչ է, քան հունվարի 23-ից առաջ սենատորների կաշառման փորձ և քվերակության գործընթացի մեջ կոռուպցիոն տարրերի ներմուծում: Եթե հունվարի 23-ից հետո որևէ ֆրանսիացի սենատորի հաշվի համարին փոխանցվի Նեկկազի խոստացված գումարը, ապա դա բացահայտ կաշառման դեպք է, ինչը քրեորեն հետապնդելի արարք է Ֆրանսիայում:

Նեկկազին այն գործարարն է, ով, իր խոսքով , 1 մլն դոլար է նախատեսել նրանց համար, ովքեր Ֆրանսիայում կժխտեն Հայոց ցեղասպանությունը և կպատժվեն 45 հազար եվրո տուգանքով: Այս դրամագլուխը ալժիրցի գործարարը նպատակ ունի օգտագործել տուգանքները փոխհատուցելու համար: Սակայն պարզվում է, որ Նեկկազին ամենևին թուրքերի հանդեպ ջերմ սիրով չի տառապում: Նա Ջիհան գործակալությանը հայտնել է, որ պատրաստվում է իր թեկնածությունն էլ առաջադրել այս տարվա գարնանը Ֆրանսիայի նախագահի պաշտոնի համար: Հետևաբար, այս արկածախնդիր գործարարն օգտագործում է Հայոց ցեղասպանության հարցը և թուրքերի հակազդեցությունը` սեփական անձի գովազդն իրականացնելու համար, առավել ևս, որ այժմ նրան մշտական ուշադրության են արժանացնում թուրքական թերթերը և լրատվական գործակալությունները:

Չի բացառվում, որ հունվարի 23-ից հետո այս ալժիրցու անունն այլևս չհայտնվի մամուլում:

http://www.armweeklynews.am/awn/12/am_1085.htm