Պայքարելու եմ մինչև մահ. Դևեջյանը` թուրք լրագրողին

 Ֆրանսիայի խորհրդարանի պատգամավոր Պատրիկ Դևեջյանը, ով ներկայացնում է իշխող Ժողովրդական շարժման միություն կուսակցությունը, թուրքական «Միլլիյեթ» պարբերականի հետ զրույց է ունեցել:

Հարցազրույցի ժամանակ հայազգի քաղաքական գործիչն անդրադարձել է Հայոց ցեղասպանության ժխտումը քրեականացնող օրինագծին:

– Ֆրանսիայում Հայոց ցեղասպանության վերաբերյալ այս օրինագիծը հայերին ի՞նչ օգուտ կա:

Այս օրինագիծը երկու բան կփոխի: Թուրքական պետությունն այլևս Ֆրանսիայում ժխտողական քաղաքականություն չի կարողանա տանել: Ֆրանսիա չեն գա թուրքերի պատրաստած բրոշյուրները, որոնց վրա գրված է, թե «Հայոց ցեղասպանությունը սուտ է»: Մյուս կողմից` հասարակության իրազեկվածությունն այդ հարցի շուրջ կբարձրանա:

– Սակայն բոլորը նշում են, թե այդ օրինագիծը Թուրքիայում կբարդացնի Ցեղասպանության քննարկումները:

Ես հակառակն եմ կարծում:

– Այս օրինագիծը Թուրքիայում առկա թիվ 301-րդ հոդվածից ինչո՞վ է տարբերվում:

Հարցով պատասխանեմ` Թուրքիան ինչո՞ւ է դեմ իր ընդունածին նման օրենքին:

Դևեջյանը նաև նշել է, թե ինքը սպառնալիքներով նամակներ է ստանում թուրքերից:
«Հյուրիյեթը» ստորագրահավաք էր սկսել: Եվրոպայում բնակվող թուրքերն ինձ 5000 նամակ էին ուղարկել: Եթե այդ օրինագիծն անցնի, նման բաներն արդեն հնարավոր չեն լինի»:

Անդրադառնալով Ֆրանսիայում օրենքի դեմ հանդես եկողներին հարցին` հայազգի գործիչը նշել է, թե Անկարայի պատասխան քայլերից հետո օրինագծի դեմ հանդես եկողները փոխել են իրենց կարծիքը:

Դևեջյանը նաև հավելել է, որ Հայոց ցեղասպանության ճանաչման համար պայքարելու է մինչև կյանքի վերջը. «Իհարկե, հոգնեցուցիչ է, սակայն պատվի հարց է»:

http://haynews.am/hy/devejyan