Ֆրանսիայի` ծագումով հայ ստեղծագործող մտավորականները` Շառլ Ազնավուրի գլխավորությամբ, կոչ են անում ֆրանսիացի սենատորներին վավերացնել Հայոց ցեղասպանության ժխտումը քրեականացնող օրինագիծը. տեղեկացնում է Nouvelles d’Arménie-ն:
«Մենք, որպես Ցեղասպանության զոհերի ժառանգներ, չենք ցանկանում վիրավորած լինել այդ ողբերգության ժխտումներից: Դրանք վիրավորում են ինչպես մեզ, այնպես էլ Ցեղասպանության զոհերին, որոնք չեն կարող այլեւս իրենց պաշտպանել: Դրանք մեզ վրդովեցնում են, քանի որ վկայում են այն ատելության մասին, որը հանգեցրեց «անուղղելիի» իրագործմանը: Դրանք մեզ շոկի մեջ են գցում, քանի որ ցույց են տալիս, որ այն ֆանատիզմը, որը հանգեցրեց Թուրքիայում հայերի տոտալ ոչնչացման, դեռեւս գոյություն ունի եւ շարունակում է հետապնդել մեզ նույնիսկ Ֆրանսիայում, որտեղ մեր ծնողները, պապերն ու տատերը ապաստան են գտել:
Ի վերջո, մենք վրդովված ենք այն սպառնալիքներից, որոնք կախվել են Հանրապետության գլխին այն բանի համար, որ ռասիզմի, խտրականության եւ ժխտման դեմ նման որոշում է կայացրել:
Մենք, ովքեր տարածում են ֆրանսիական մշակույթը` դրա տարբեր դրսեւորումներով, կոչ ենք անում պետության ղեկավարին, աջերի ու ձախերի կառավարությանը, որոնք քվեարկել են հօգուտ օրինագծի, ամուր կանգնել իրենց դիրքերում եւ ապահովել դրա վավերացումը Սենատում»,- ասվում է կոչում, որը ստորագրել են` Շառլ Ազնավուր (երգիչ), Սիմոն Աբգարյան (դերասան), Սերժ Ավեդիքյան (դերասան), Վինսենտ Բագույան (երգիչ), Էրիկ Սիվանյան (ռեժիսոր), Սոֆի Ֆոնտանել (գրող), Ռոբեր Գեդիկյան (ռեժիսոր), Պասկալ Լեժիտիմո (դերասան), Մեթյու Մադենյան (հումորիստ), Անդրե Մանուկյան (երաժիշտ), Ֆրեդերիկ Նեւչեիրլյան (երգիչ), Լեւոն Սայան (պրոդյուսեր), Էլեն Սեգարա (երգչուհի), Ալեն Թերզյան (պրոդյուսեր):
Leave a Reply