Սարկոզիի նամակն Էրդողանին. Ծայրահեղ քայլերը երկու երկրների հարաբերություններին կարող են վնասել

CNNTurk-ի հաղորդմամբ՝ Ֆրանսիայի նախագահ Նիկոլա Սարկոզին նամակ է հղել Թուրքիայի վարչապետ Ռեջեփ Թայիփ Էրդողանին՝ անդրադառնալով հունվարի 23-ին Սենատում կայանալիք Ցեղասպանությունների ժխտումը քրեականացնող օրինագծին, երկու երկրների հարաբերությունների լարվածությանն ու հետագա ճակատագրին:

«Հարգելի վարչապետ,
Պատասխանելով ինձ ավելի վաղ ուղարկված Ձեր նամակին` գրում եմ մի օրինագծի մասին, որ քննարկվելու է Սենատում, և որը երկու երկրների հարաբերությունների տեսանկյունից շատ կարևոր է: Նախ ասեմ, որ օրենքի նպատակը ֆրանսիական հասարակության մեջ երկար ժամանակ առկա հերքման զգացումը հաղթահարելը և 100 տարվա պատմություն ունեցող վերքերը բուժելն է:

Սա ճանաչված բոլոր ցեղասպանություններին ուղղված ընդհանրական մի օրինագիծ է: Օրինագծի տեքստում ոչ մի ժողովուրդ և պետություն նշանառված չէ: Որովհետև մենք շատ լավ հասկանում ենք նաև թուրք ժողովրդի` Առաջին աշխարհամարտի տարիներին և Օսմանյան կայսրության կործանման ժամանակ ապրած ցավը:

Գիտեմ, որ պատմության հետ առերեսվելը հեշտ չէ: Սակայն Ֆրանսիան ճանաչման ուժ ունեցող այս պարտականությունը կատարեց. ընդունեց ստրկավաճառության պատասխանատվությունը: Գերմանական բռնազավթման ժամանակ Ֆրանսիայում ապրող հրեաներին հավաքելով` ուղարկեց ճամբարներ: Ես անձամբ 2007 թ. Ալժիրի Կոնստանտին քաղաքում ելույթ ունենալով` քննադատեցի Ֆրանսիայի կողմից Ալժիրի գաղութացման վայրագությունը և Ալժիրի ժողովրդի անբացատրելի ցավերի մասին խոսեցի:

Թուրքիան մի մեծ երկիր է և Ֆրանսիայի համար կարևոր գործընկեր է: Որպես երկու բարեկամ և գործընկեր երկրներ ցանկանում եմ, որ մեզ հարիր ձևով խելամտություն ցուցաբերենք: Ուզում եմ իմանաք, որ այս օրենքի առնչությամբ կատարվելիք ծայրահեղ քայլերը երկու երկրների բազմակողմանի հարաբերություններին կարող են վնասել և պատասխանատվությունը նախաձեռնության հեղինակներինը կլինի»,- ասվում է Ֆրանսիայի նախագահի նամակում:

Հիշեցնենք, որ հունվարի 23-ին Ֆրանսիայի Սենատում քննարկման է դրվելու Ցեղասպանությունների, այդ թվում նաև՝ Հայոց ցեղասպանության ժխտումը քրեականացնող օրենքի նախագիծը: 2011թ. դեկտեմբերի 22-ին այն ընդունվեց Ֆրանսիայի խորհրդարանի ստորին պալատի` Ազգային ժողովի կողմից: Ընդունված օրինագիծը սահմանում է մինչև մեկ տարի ազատազրկում և մինչև 45.000 եվրո տուգանք ցեղասպանության իրողությունը ժխտելու համար:

Նշենք նաև, որ այդ բանաձևի հեղինակն է Ֆրանսիայի նախագահի ղեկավարած «Ժողովրդական շարժման միություն» կուսակցության պատգամավոր Վալերի Բուայեն, ով շարունակում է իր հայանպաստ գործունեությունը՝ բոլոր ամբիոններից կոչ անելով մինչև վերջ տանել ցեղասպանության ժխտման օրինագծի հաստատման գործընթացը:

Օրինագծի առաջադրման օրվանից թուրքական կողմը սկսեց ակտիվություն ցուցաբերել սպառնալից հայտարարություններով: Իսկ ԱԺ-ի կողմից ընդունումից հետո Թուրքիայի վարչապետ Էրդողանի կողմից հրապարակվեցին այն պատժամիջոցների շարքը, որը Թուրքիան պատրաստվում էր կիրառել Ֆրանսիայի նկատմամբ: Թուրքիան մասնավորապես հայտարարեց տնտեսական և ռազմական պայմանագրերի սառեցման մասին:

Պաշտոնական Անկարան նաև հետ կանչեց Ֆրանսիայում իր դեսպանին՝ խորհրդակցությունների նպատակով: Մի քանի օր անց, սակայն, դեսպանը նոր առաքելությամբ վերադարձավ Փարիզ. այն է՝ ակտիվ լոբբինգ իրականացնել՝ Սենատում օրինագծի ընդունումը թույլ չտալու ուղղությամբ:

http://www.times.am/?l=am&p=3949