Բուայեն մեկնաբանում է՝ ինչու պետք է ընդունել իր առաջարկած օրինագիծը

Ֆրանսիայի Ազգային ժողովի պատգամավոր Վալերի Բուայեն անդրադարձել է այն բոլոր փաստարկներին, որ բերվում են Ցեղասպանությունների ժխտումը քրեականացնող օրինագծի դեմ: Ինչպես հաղորդում է «Արմենպրես»-ը՝ վկայակոչելով Nouvelles d’Armenie-ն, Բուայեն նախ անդրադարձել է այն փաստարկներին, թե իբր այդ օրինագիծը հիշողությանն է առնչվում: «Սա հիշողության օրենք չէ, քանի որ մենք քրեորեն պատժելու ենք ներկայում տեղի ունեցող գործողությունը, այն է՝ մեր տարածքում Ֆրանսիայի կողմից օրենքով ճանաչված ցեղասպանությունների ժխտման քրեականացում»,- ասել է Բուայեն:

Պատգամավորը նաև մեկնաբանել է այն խոսակցությունները, թե օրինագիծը սահմանափակում է խոսքի և արտահայտման ազատությունը: «Աշխարհի բոլոր երկրներում խոսքի ազատությունը սահմանափակումներ ունի: Այս սահմանափակումները հիմնականում ուղղված են քաղաքացիական անդորրն ու անվտանգությունը ապահովելու համար»,- հավելել է Վալերի Բուայեն:

Օրենքի հակասահմանադրականության մասին խոսելիս Բուայեն նշում է, որ ֆրանսիական խորհրդարանն է այն միակ իրավասու մարմինն ամբողջ երկրում, որ սահմանում է պարտադիր իրավասություն ունեցող օրենքներ:

Բուայեն հերքում է նաև այն պնդումը, թե իբր օրինագիծն ուղղված է մինչև Ֆրանսիայում նախագահական ընտրություններն իշխող կուսակցության համար ձայներ ապահովելու համար, հենց դրա համար էլ հիմա է առաջ քաշել:  «Մարդիկ ընտրում են պատգամավորների, որ նրանք օրենքներ առաջադրեն, իսկ դա նրանք կարող են, երբ ցանկանան»,- եզրափակում է Բուայեն:

21.01.2012

Armenpress.am