Թուրքիան «տեղը չի գտնում» Ֆրանսիայի Սենատում հայկական օրինագծի ընդունման վախից

Թուրքիայի խորհրդարանի արտաքին հանձնաժողովը Ֆրանսիայի խորհրդարանում ընդունված Հայոց ցեղասպանության ժխտումը քրեականացնող օրինագծի` Սենատում չվավերացնելու պահանջով ծանուցում-զգուշացում է տարածել, որում սպառնացել է, որ եթե Սենատը վավերացնի հայկական օրինագիծը, ապա «Թուրքիան անհրաժեշտ քայլեր կկատարի»:

Ինչպես հաղորդում է «Արմենպրես»–ը, վկայակոչելով թուրքական TRT հանրային հեռուստատեսությունը, Ֆրանսիային ուղղված ծանուցում-զգուշացումը Թուրքիայի խորհրդարանի արտաքին հանձնաժողովում պատրաստվել է հակահայկական գործունեությամբ հայտնի տխրահռչակ պատմաբան, Թուրքիայի պատմագիտական ընկերության նախկին տնօրեն, Ազգայնական շարժում կուսակցության պատգամավոր Յուսուֆ Հալաչօղլուի եւ Թուրքիայի իշխող Արդարություն եւ զարգացում կուսակցության (ԱԶԿ)` Անկարայից ընտրված պատգամավոր Սեյիդ Սերթչելիքի ունեցած ելույթների հիման վրա:

Հանձնաժողովի պատրաստած տեքստը չի ստորագրել միայն Թուրքիայի խորհրդարանում միակ քրդական Խաղաղություն եւ ժողովրդավարություն կուսակցության պատգամավոր, հանձնաժողովի անդամ Նազմի Գյուրը:

Ֆրանսիայի Սենատ ուղարկված ծանուցագրում թուրքական հանձնաժողովը զգուշացնում է, որ Հայոց ցեղասպանությունը ժխտողներին 1 տարվա ազատազրկում եւ 45 հազար եվրո տուգանք նախատեսող օրինագծի վավերացման դեպքում թուրք-ֆրանսիական հարաբերությունների հարցում «Թուրքիան հարկադրված կլինի անհրաժեշտ քայլեր կատարել. կխաթարվեն Թուրքիայի եւ Ֆրանսիայի միջեւ համագործակցական կապերը, Անկարան կվերանայի Փարիզի հետ ապագա պաշտոնական հարաբերությունը»:

Armenpress.am