Հրանտ Դինքին «Էրգենեկոնն» է սպանել. Ուֆուք Ուրաս

Թուրքիայի խորհրդարանի անկախ պատգամավոր Ուֆուք Ուրասը հայտարարել է, որ Ստամբուլի «Ակօս» թերթի հայազգի խմբագրապետ Հրանտ Դինքին սպանել է Թուրքիայում հեղաշրջման փորձ նախապատրաստելու մեղադրանքով «Էրգենեկոն» քրեական գործով անցնող   խորքային պետության մաս կազմողների ավազակախումբը:

Ինչպես հաղորդում է «Արմենպրես»–ը, CNN Turk հեռուստաալիքի` «Ակօս»-ի խմբագրատան մոտից տված հաղորդման մեջ, նշելով, որ Դինքի սպանության գործով Ստամբուլի 14-րդ ծանր հանցագործությունների դատարանի ընդունած որոշումը զայրույթ է առաջացրել հասարակության մեջ, թուրք պատգամավորը միանգամայն անընդունելի է համարել այն եւ ընդգծել, որ անհրաժեշտ է բացահայտել հանցագործության հետեւում կանգնած կազմակերպված խմբավորմանը:

«Մենք չենք ընդունում այս դատավճիռը, քանի որ, կազմակերպված հանցավոր խումբ լինելու պայմաններում, 5 տարի շարունակ դատարանը զբաղված է եղել ծածկելով նրանց եւ մարդասպանների միջեւ եղած ակնհայտ կապը: Ամբողջ գործընթացը փուլ առ փուլ ծրագրված է եղել: Դատարանը վախից չի ցանկացել վկա կամ կասկածյալ դարձնել այդ խմբավորման որեւէ անդամի: Բացակայել է նաեւ իշխանության  քաղաքական կամքը: Եթե քաղաքական կամք լիներ, Թուրքիայի հեռահաղորդակցական միության (TIB) բացահայտած` հանցագործությունն իրագործողների հետ ունեցած հեռախոսազրույցների գրանցումներն ու ապացույցներն այդքան ուշ չէին ներկայացվի դատարան: Ես որեւէ կասկած չունեմ, որ Հրանտին սպանող ուժը «Էրգենեկոնն» է եղել: Քանի որ, Դինքի կենդանության օրոք նրան սպառնացող այդ ավազախմբի անդամները ներկայում ձերբակալված են հենց այդ քերական գործով: Ակնհայտ փաստ է, որ «Էրգենեկոն»-ի գործով կալանված անձինք կապեր են ունեցել սպանությունն իրագործողների հետ եւ հեռախոսային կապի մեջ են եղել եւ սպանությանը նախորդած օրերին, եւ սպանության օրը», -ասել է Ուրասը, եւ մեջբերելով Դինքի այրու` Ռաքելի հետեւյալ խոսքը, թե «ամեն բան իր արժանի լուծումը կգտնի», հավելել. «Նշանակում է` Թուրքիան նույնպես արժանի է նման խայտառակ եւ ամոթալի արդարադատության»:

Armenpress.am