Թուրքական և համաշխարհային մամուլը` Դինքի սպանության դատավճռի մասին

Հրանտ Դինքի սպանության վերաբերյալ դատարանի կայացրած դատավճիռը հարուցել է թուրք հասարակայնության առաջադեմ շրջանակների և մամուլի վրդովմունքին: Ուշագրավ է, որ սույն դատավճռին իրենց բացասական արձագանքն են հայտնել թուրքական գրեթե բոլոր հեղինակավոր թերթերը: Այսպես, «Միլիեթը» «Հրանտը մնաց իր ընկած տեղում» վերնագրով առաջնորդողում խորը հիասթափություն է արտահայտել Դինքի սպանության դատավճռի կապակցությամբ: «Ջումհուրիեթը» իր բողոքն է հայտնել` «Այս դատն այսպես չպետք է ավարտվի» և «5 տարի անց կայացված դատավճիռ, որը կարծես ծաղրում է մեզ» արտահայտություններով:

ԵՄ լրատվության և քաղաքականության կայքէջի (www.euractiv.com.tr) փոխանցմամբ` թուրքական հեղինակավոր մյուս պարբերականները Դինքի սպանության գործով դատավճռի մասին տեղեկացրել են հետևյալ վերնագրերով. «Հյուրիեթ»` «Պարզվում է` Դինքին կազմակերպությունը չի սպանել տվել», «Սաբահ»` «Ցմահ բանտարկություն` միայն Հայալին», «Հաբերթյուրք»` «Կազմակերպությունը դարձավ Հայալը», «Վաթան»` «Այն ծածկոցը չբարձրացվեց», «Թարաֆ»` «Սպիտակ բերետավոր պետությունը», «Զաման»` «Դատարանը չնկատեց կազմակերպությանը», «Ռադիկալ»` «Պարզվում է` կազմակերպությունը Հայալն է», «Փոսթա»` «Ծիծաղում են մեզ վրա», «Յենի Շաֆաք»` «Կազմակերպություն չկա. լրիվ պատահականություն է»:

Դինքի սպանության դատավճռին անդրադարձել են նաև համաշխարհային հեղինակավոր լրատվամիջոցներ: Թուրքական “Acikgazete” անկախ օրաթերթի հաղորդմամբ` ամերիկյան CNN հեռուստակայանը այս թեմայով լրատվության ժամանակ տեղ է հատկացրել Դինքի փաստաբան Ֆեթհիե Չեթինի տեսակետին: Չեթինը «կատակերգություն» է որակել դատարանի որոշումը:

Անգլիական “Guardian” օրաթերթը Դինքի սպանության դատավճռի մասին հրապարակման մեջ հիշեցրել է, որ Դինքը պարբերաբար սպառնալիքների էր ենթարկվել թուրք ծայրահեղ ազգայնական խմբերի կողմից:

“Die Zeit” գերմանական քաղաքական շաբաթաթերթը շեշտել է, որ դատարանի դահլիճում Դինքի գործի քննությանը հետևող մի խումբ մարդիկ իրենց դժգոհությունն են հայտնել կայացված դատավճռի կապակցությամբ:

Դինքի սպանության գործի դատավճռի հարցին մեծ տեղ է հատկացրել նաև գերմանական “Der Spiegel” ամսագիրը, որը հաղորդել է այն խիստ հակազդեցության մասին, որ դատավճռի դեմ արտահայտել են Դինքի մերձավորները: “Der Spiegel”-ը նաև նշել է, որ Դինքի փաստաբանը դատարանի կայացրած որոշմանը տվել է «Ծաղր» բնորոշումը, և որ դատավճիռը բողոքարկվելու է վճռաբեկ դատարանում:

19.01.2012

Akunq.net