Դինքի սպանության գործով դատավճիռը վտանգավոր զարգացում էր. Թուրքիայի մշակույթի նախարար

Թուրքիայի մշակույթի եւ տուրիզմի նախարար Էրթուղրուլ Գյունայը Դինքի սպանության գործով դատարանի կայացրած վճիռը վտանգավոր զարգացում է համարել:

Թուրքական Haberaktuel-ի փոխանցմամբ` Էրթուղրուլ Գյունայլը նշել է, թե դատավճռով բոլոր մեղադրյալները կազմակերպված խմբավորման անդամ լինելու մեղադրանքից ազատվեցին, ինչը վտանգավոր զարգացում էր: «Դատական գործընթացն արդեն ավարտվել է, եւ քննադատելու իրավունք կա: Կարծում եմ, որ որոշումը բողոքարկվելու է վճռաբեկ դատարանում: Այս գործին ուշադրությամբ հետեւում ենք»,-ասել է Թուրքիայի մշակույթի եւ տուրիզմի նախարարը:

Հունվարի 17-ին թուրքական դատարանը Դինքի սպանության գործում Յասին Հայալին մեղավոր ճանաչեց սպանությունը ծրագրավորելու եւ կազմակերպելու մեղադրանքով եւ դատապարտեց ցմահ ազատազրկման։ Սպանության ուղղորդողներից Էրհան Թունջելը Դինքի սպանության գործով անմեղ ճանաչվեց եւ դատապարտվեց 10 տարի 6 ամիս պատժաչափի՝ Mc Donald’s-ի պայթյունի համար։ Սակայն դատարանը նրան ազատ արձակման որոշում է կայացրել` հաշվի առնելով, որ նա այսքան ժամանակ գտնվել է կալանքի տակ: Համապատասխան գործընթացից հետո Էրհան Թունջելը ազատ է արձակվել:

Նշենք, որ թուրքական  դատարանը ավելի վաղ Դինքի սպանությունն իրականացրած Օգյուն Սամասթին դատապարտել է 21 տարի 6 ամիս ազատազրկման՝ կանխամտածված սպանության համար եւ 1 տարի 4 ամիս՝ անօրինական զենք կրելու համար։ Ըստ այդմ` Սամասթի պատժաչափը հասել է 22 տարի 10 ամսվա:

Օգյուն Սամասթի փաստաբանի դիմումի համաձայն՝ նրա գործը տեղափոխվել էր Ստամբուլի անչափահասների համար նախատեսված դատարան, քանի որ փաստաբանը հիմնավորել էր, թե սպանության պահին Սամասթը անչափահաս է եղել։

 http://news.am/arm/news/89566.html