Ստամբուլի 14-րդ ծանր հանցագործությունների դատարանում 2007 թ-ի հունվարի 19-ին թուրքական ազգայնամոլական շրջանակների կողմից սպանված «Ակօս» թերթի հայազգի խմբագրապետ Հրանտ Դինքի սպանության գործով 25-րդ դատալսումից հետո դատավճիռ է հրապարակվել:
Ինչպես հաղորդում է «Արմենպրես»–ը` վկայակոչելով CnnTurk հեռուստաալիքը, դատարանը «հանցագործությունը մտադրելու» մեղադրանքով ցմահ բանտարկության պատիժ է որոշել Յասին Հայալին: Սպանությունն ուղղորդելու մեղադրանքով գործով անցնող կասկածյալ Էրհան Թունջելի վերաբերյալ դատարանը պատիժ չի սահմանել: Նրա նկատմամբ դատարանը 10 տարի 6 ամիս ժամկետով ազատազրկման պատիժ է վճռել Տրապիզոնի McDonalds-ի վրա ռումբ նետելու համար: Դատարանը Հրանտ Դինքի դատական գործի վերաբերյալ որոշման մեջ նշել է, որ «հանցագործությունը որեւէ կազմակերպության գործ չէ»:
Դատավճռի հրապարակումից հետո «Հրանտի ընկերները» հանդես են եկել հետեւյալ հայտարարությամբ. «Այս որոշումը թուրքական պետության որոշումն է: Անվտանգության մարմինների, ժանդարմերիայի, հետախուզության, դատարանի, մամուլի, կառավարության, ընդդիմության հետ միասին 5 տարի առաջ Հրանտին մեր միջից վերացնելու որոշում ընդունած իշխանությունն այժմ էլ նման խայտառակ վճիռ է ընդունել իր կողմից վերահսկվող արդարադատության սրահում»:
Նշելով, որ «մինչեւ չասենք ավարտվեց, Հրանտի գործը ավարտված չի համարվելու», հայտարարության մեջ «Հրանտի ընկերները» հայտնել են, որ հունվարի 19-ին` Հրանտ Դինքի սպանության օրը, երթ են կազմակերպելու դեպի Ստամբուլի կենտրոնական Թաքսիմ հրապարակ եւ հեղեղելու են քաղաքի փողոցները:
17.01.2012
Armenpress.am
Leave a Reply