Ֆեթհիե Չեթինը Դինքի սպանությունը թուրքական պետության խորքում ծրագրված եւ իրագործված հանցագործություն է որակել

2007 թ. հունվարի 19-ին Ստամբուլում սպանված «Ակօս» թերթի հայազգի խմբագրապետ Հրանտ Դինքի ընտանիքի փաստաբան Ֆեթհիե Չեթինը հայտարարել է, որ Դինքի սպանությունը թուրքական պետության խորքում ծրագրված եւ իրագործման դրված հանցագործություն է:

Ինչպես հաղորդում է «Արմենպրես»–ը, թուրքական «Յենի շաֆաք» թերթին տված հարցազրույցում Չեթինն ասել է, որ Դինքի սպանության նախապատրաստման գործընթացում որոշիչ դեր են խաղացել Թուրքիայում ռազմական հեղաշրջման փորձ նախապատրաստելու մեղադրանքով «Էրգենեքոն» քրեական գործի շրջանակում կալանավորված թուրքական բանակի գեներալ Վելի Քյուչյուքը, Օքթայ Յըլդըրըմը եւ Քեմալ Քերինչսիզը:

«Չնայած նրանց մեղսունակության մասին բազմաթիվ փաստերին, մինչ օրս մեզ չի հաջողվել Դինքի գործով դատարան կանչել նրանց եւ հարցաքննել: Մենք համոզված ենք, որ Դինքի սպանությունը կազմակերպել է «Էրգենեքոն»-ը գերազանցող հսկա հանցագործ կազմակերպությունը», -ասել է Չեթինը:

Փաստաբանն ասել է, որ դատաքննության 5 տարիների ընթացքում իրենց հաջողվել է բացահայտել սպանության հետ առնչվող 20 մարդկանց անուններ եւ նրանց դատարան կանչել որպես կասկածյալների ու վկաների, որոնց ցուցմունքներից պարզ է դարձել, որ սպանությունը նախապատրաստվելու մասին տեղյակ են եղել Թուրքիայի անվտանգության տնօրինության աշխատակիցները:

«Մեզ հաջողվել է պարզել եւ դատական գործին կցել Դինքի մարդասպանի եւ նրան ուղղորդողների հետ սպանությանը նախորդած օրերին եւ նույն օրը հեռախոսային կապի մեջ եղած 5 պաշտոնյաների անունները եւ նրանց հեռախոսային խոսակցությունների ձայնագրությունները, ինչը միանգամայն նոր բովանդակություն է հաղորդում դատաքննության ու դատավարության գործընթացին: Հրանտ Դինքի սպանությունը պետության խորքերում ծրագրված եւ իրագործման դրված հանցագործություն է: Հանցագործությունը նախապատրաստվել է որոշակի ժամկետում, որի մեջ մեծ դերակատարություն են ունեցել բանակի գեներալ Վելի Քյուչյուքը, Օքթայ Յըլդըրըմը, Քեմալ Քերինչսիզը եւ ուրիշներ, որոնք «Էրգենեքոն» քրեական գործով անցնող կասկածյալների մեջ են: Սպանության պատճառը Հրանտ Դինքի` ազգությամբ հայ լինելն է եղել: Թուրքական պետությունը քաղաքական հանցագործությունների եւ հայերին թշնամի տեսնելու «Իթթիհադ եւ Թերաքի»-ի ավանդույթ ունի: Թուրքիայի` դեմոկրատական պետության վերածվելու առանցքային կետը Հրանտ Դինքի սպանության դատական գործն է, քանի որ այն իր մեջ ներառում է այդ ավանդույթի բոլոր ծածկագրերը: Մենք բացահայտել են, որ Թուրքիայի ազգային հետախուզական մարմինները, վտանգ տեսնելով Օրհան Փամուքի, Մեհմեդ Ալի Բիրանդի կյանքի ապահովության մեջ, պահպանության տակ են առել նրանց, իսկ այդ նույնը բանը չի արվել Հրանտ Դինքի պարագայում, որովհետեւ նա ազգությամբ հայ է», -ասել է Դինքի ընտանիքի փաստաբանը:

Armenpress.am