Ինչպես հաղորդել էր «Ակունքը», վերջերս պատրիարքական ընդհանուր փոխանորդ, արքեպիսկոպոս Արամ Աթեշյանը Ստամբուլի 13-րդ վարչական դատարանում գործ էր հարուցել Ստամբուլի Սիրքեջի թաղամասում գտնվող Սանասարյան խանի շենքը հայկական համայնքին վերադարձնելու նպատակով: Սույն թվականի հունվարի 13-ին Վաքըֆների գլխավոր տնօրեն Ադնան Էրթեմն այդ կապակցությամբ հարցազրույց էր տվել «Անադոլու» լրատվական գործակալության թղթակցին և նշել, թե իբր «Սանասարյան Մկրտիչ Աղա» հիմնադրամը հիմնվել է օսմանահպատակ մի հայի կողմից և ոչ մի կապ չունի Պոլսո հայկական համայնքի հետ: Հետևաբար` սույն վաքըֆը չի կարող օգտվել համայնքային վաքըֆներին վերաբերող օրենքից, և Սանասարյան խանը չի կարող վերադարձվել Պոլսո հայոց պատրիարքարանին»: Ստորև ներկայացնում ենք Սանասարյան խանի տնօրեններից մեկը եղած Հովսեփ Մադաթյանի թոռնուհու նամակը, որը հրապարակվել է պոլսահայերի «Հայթերթ» կայքում:
«Սանասարյան Խանը հիմնադրվել է 1881 թ. Էրզրումում (Կարին) բացված Սանասարյան դպրոցին եկամուտ բերելու համար, իսկ սույն վաքըֆի ղեկավարումը հանձնվել է Պոլսո հայոց պատրիարքարանին: Ղեկավար խորհրդի նախագահ է համարվել պատրիարք Մաղաքիա Օրմանյանը, իսկ անդամներն են եղել Ա. Ունջիյանը, Կ. Նորատունկյանը, Կ. Ասլանյանը, Կ. Գյումյուշգերդանը, Բ. Գյուլբենկյանը, Վ. Եսայանը, Ա. Կարագյոզյանը և Հ. Ասատուրը: Էրզրումում գտնվող փոքր ղեկավար խորհրդի նախագահն էլ եղել է Զավեն վարդապետ Տեր-Եղիայանը:
Մեծ հայրս` Հովսեփ Մադաթյանը, եղել է Սանասարյանի երեք տնօրեններից մեկը, և ես որոշ փաստաթղթեր ունեմ այդ հարցի առնչությամբ: Տվյալ փաստաթղթերի բնագրերը գտնվում են Փարիզի «Նուբարյան» գրադարանում:
Ցանկացողներին կարող եմ նաև PDF տարբերակով ուղարկել հայերեն «Կալվածներ» բաժինը»:
Ա. Նուրհան Բեջիդյան
16.01.2012
Akunq.net
Leave a Reply