Դատապարտելը պատմաբանների խնդիրը չէ, պետության խնդիրն է

Թուրքերը կրկին թակարդում են, քանի որ Բուլղարիայի խորհրդարանի որոշումը կարելի է և լավ, և վատ լուր համարվել Թուրքիայի համար:

Բուլղարիայի խորհրդարանը, ձայների բացարձակ մեծամասնությամբ, ընդունել է որոշում , որով դատապարտում է նախկին կոմունիստական վարչակազմի կողմից թուրքերի ստիպողական ձուլման և պարտադրված արտագաղթի քաղաքականությունը:

Հիշեցնենք, որ անցյալ դարի ութանասունական թվականներին Բուլղարիայի իշխանությունները երկրում բնակվող բոլոր այլազգիներին բուլղարացի հայտարարեցին և անձնագրերում համապատասխան փոփոխություններ կատարելով, երկիրը հայտարարեցին միատարր` ազգային տեսակետից: Արդյունքում շուրջ 350 հազար թուրքեր արտագաղթեցին երկրից, փորձելով խուսափել ձուլումից: Այս նախագծի հեղինակ, Բուլղարիայի Հանուն Հզոր Բուլղարիայի ժողովրդավարներ կուսակցության ղեկավար Իվան Կոստովը հայտարարել էր, որ անհրաժեշտ է երկրի պատմության ցավալի էջերից մեկն ընթերցել և փակել այն: Բուլղարիայի խորհրդարանի այս որոշումը մեծ խանադավառությունով է ընդունել Թուրքիայի արտաքին գործերի նախարարությունը և հանդես է եկել համապատասխան հայտարարությամբ:

Հիմա թուրք մտավորականները հարց են բարձրացնում, թե ինչու է այդպես ոգևորվել երկրի արտգործնախարարությունը: Եթե բուլղարացիները համարձակություն գտան և կարողացան առերեսվել իրենց պատմության մութ էջերի հետ, ապա Թուրքիայի խորհրդարանը ոչ միայն չի քննարկում 1915-ի Հայոց ցեղասպանության խնդիրը, այլ երբ նույնիսկ ուրիշ երկրների խորհրդարաններն են քննարկում այդ հարցը, Թուրքիայի արտգործնախարարությունը պահանջում է պատմությունը թողնել պատմաբաններին (Էյուփ Ջան, «Ռադիկալ» օրաթերթ): Իսկ եթե բուլղարացի խորհրդարանականները մերժեին նախագիծը և պահանջեին, որ Թուրքիայի օրինակով «պատմությունը պետք է թողնել պատմաբաններին», իհարկե այս պարագայում Թուրքիայի արտգործնախարարությունը կպահանջեր, որպեսզի բուլղարացիները համաձակություն ունենային և առերեսվեին իրենց պատմության ցավալի էջերի հետ:

Հիմա Թուրքիան Ֆրանսիայի նախագահից պահանջում է Հայոց ցեղասպանության խնդիրները թողնել պատմաբաններին` մոռանալով, որ հատուկ հայտարարությամբ ողջունել է Բուլղարիայի խորհրդարանի որոշումը: Թուրքիայի խորհրդարանը դեռևս չի հասունացել բարոյապես, որ բուլղարացիներից օրինակ վերցնի:

http://www.armweeklynews.am/awn/12/am_1035.htm