Թուրքիայի նախագահ Աբդուլլա Գյուլի պաշտոնավարման ժամկետն ավարտվելուց հետո վարչապետ Ռեջեբ Թայիբ Էրդողանին այդ երկրի նախագահի պաշտոնում տեսնում է թուրք ժողովրդի 36 տոկոսը:
Այս մասին, ինչպես հաղորդում է «Արմենպրես»-ը, հայտնում է թուրքական «Միլիեթ» թերթը` հղում կատարելով թուրքական IKSARA հասարակական հարցման կենտրոնի անցկացրած հարցումների արդյունքներին:
IKSARA-ն «Ում եք ցանկանում տեսնել Թուրքիայի հաջորդ նախագահ» հարցով հարցումներն անցկացրել է Թուրքիայի 81 նահանգներում 2055 մարդկանց միջեւ` 2011-ի դեկտեմբերի 29-ից 2012-ի հունվարի 6-ը: Թուրքական հետազոտական կենտրոնը նաեւ պարզել է, որ Էրդողանի` Թուրքիայի նախագահի պաշտոնում դեմ չեն տեսնել նրա գլխավորած «Արդարություն եւ զարգացում» կուսակցության (ԱԶԿ) համակիրների 65 տոկոսը, ընդդիմադիր կուսակցություններից` Ժողովրդահանրապետական (ԺՀ) եւ քրդամետ Խաղաղություն եւ ժողովրդավարություն (ԽԺ) կուսակցությունների համակիրների 7.1 տոկոսը, Ազգայնական շարժում կուսակցության (ԱՇԿ) համակիրների 17.83 տոկոսը:
Հարցվածների 6 տոկոսը Թուրքիայի հաջորդ նախագահի պաշտոնում ցանկանում է տեսնել փոխվարչապետ Բյուլենթ Արինչին, 5 տոկոսը` ԺՀԿ առաջնորդ Քեմալ Քըլըչդարօղլուին, 4 տոկոսը` ԱՇԿ առաջնորդ Դեւլեթ Բահչելիին:
Հարցվածների 18.04 տոկոսը Էրդողանից հետո ԱԶԿ-ի առաջնորդի պաշտոնում ցանկություն է հայտնել տեսնել Բյուլենթ Արինչին, 14.51 տոկոսը` Աբդուլլա Գյուլին, 7.26 տոկոսը` էկոնոմիկայի նախարար Ալի Բաբաջանին, 5.23 տոկոսը` խորհրդարանի նախագահ Ջեմիլ Չիչեքին եւ 5.2 տոկոսը` արտգործնախարար Ահմեդ Դավութօղլուին:
Armenpress.am
Leave a Reply