Թուրք պրոֆեսորը Թուրքիայի իշխանություններից պահանջում է վերացնել քրդերին

Անկարայի համալսարանի իրավաբանական ֆակուլտետի մարդու իրավունքների գծով պրոֆեսոր Անըլ Չեչենը Թուրքիայի խորհրդարանի մարդու իրավունքների հանձնաժողովում հայտարարել է, որ Թուրքիայի քրդաբնակ տարածաշրջանում տեղի ունեցող իրադարձություններն այլեւս չպետք է դիտարկել մարդու իրավունքների տեսանկյունից, իսկ քրդերի դեմ պայքարը պետք է գհահատվի որպես իրավական պատերազմ:
Ինչպես հաղորդում է «Արմենպրես»-ը` վկայակոչելով CNNTurk-ը, իրավապաշտպան թուրք պրոֆեսորը Թուրքիայի իշխանություններին կոչ է արել ազատվել քրդերից` վերացնելով կամ էլ արտաքսելով նրանց Թուրքիայի տարածքից:
Ցեղասպան նախնիների ժառանգը նշել է, որ թուրքական պետության ինքնիշխանությունը ցուցադրելու համար անհրաժեշտ է քրդերի դեմ պայքարը իրավական պատերազմ հայտարարել, սահմանափակել քրդերի ծնելիությունը, հրթիռակոծել քրդերի միտինգները, ձերբակալել դրանց մասնակիցներին եւ զանգվածաբար արտաքսել երկրից: Նշվում է, որ ֆաշիստ թուրք պրոֆեսորի ելույթը շոկ է առաջացրել հանձնաժողովի անդամների մոտ:
63-ամյա թուրք «պրոֆեսոր»-ը կրթությունը ստացել է Անկարայի համալսարանի իրավաբանական ֆակուլտետում: 1974-1978 թթ-երին եղել է ՅՈՒՆԵՍԿՕ-ի կրթության հանձնաժողովի քարտուղարը: Ներկայում գլխավորում է Անկարայի համալսարանի իրավաբանական ֆակուլտետի պետական իրավունքի ամբիոնը: Համալսարանում դասավանդում է Աթաթուրքի սկզբունքներն ու հեղափոխական պատմությունը առարկան: Նա հեղինակել է Թուրքիայի երիտասարդությանը կրթող «Արհմիությունները Թուրքիայում», «Սոցիալական դեմոկրատիա», «Թուրքական պետությունները», «Թուրքական պետությունները պատմության մեջ», «Մարդու իրավունքները», «Ժողովրդական տներ» գրքերը:

12.01.2012
Armenpress.am