Դիարբեքիրի կորուսյալ ժողովուրդները վերադառնում են տուն

Ինչպես ավելի վաղ հաղորդել էր «Ակունք»-ը, Թուրքիայում մոտ օրերս կազմակերպվելու է «Մշակութային բազմազանությունը հին Դիարբեքիրում» խորագրով ցուցահանդեսը:

Թուրքական Haberler.com լրատվական կայքի փոխանցմամբ` ցուցահանդեսը բացվելու է վաղը` հունվարի 14-ին, Դիարբեքիրի Sümerpark Amed Sanat պատկերասրահում: Ցուցահանդեսի կուրատորն է «Բիրզամանլար» հրատարակչության տնօրեն Օսման Քյոքերը:

«Մշակութային բազմազանությունը հին Դիարբեքիրում» խորագրով ցուցահանդեսում 200-ից ավել լուսանկարների միջոցով, լուսանկարներ, որոնց մեծ մասն արվել է անցյալ դարի սկզբներին, Դիարբեքիրի նոր բնակիչներին է ներկայացվում քաղաքի կորուսյալ ժողովուրդները: Լուսանկարներում արտացոլված են քաղաքի` այն ժամանակվա ճարտարապետական կառուցվածքը և տեսարաններ` առօրյա կյանքից: Սույն քաղաքում եղել են դպրոցներ, որոնք հիմնադրվել են ոչ միայն հայերի և ասորիների, այլ նաև` կաթոլիկների և բողոքականների կողմից: Հայերենով հրատարակված պարբերականների, թատերախմբերի, հայկական և ասորական նվագախմբերի առկայությունը ցույց է տալիս քաղաքի կյանքի բազմազանությունը: Դիարբեքիրի քաղաքապետարանի հովանու ներքո բացվող ցուցահանդեսի կազմակերպիչներն են «Բիրզամանլար» հրատարակչությունը, Anadolu Kültür հիմնադրամը և Global Dialogue նախագիծը: Թուրքերենով, քրդերենով և անգլերենով պատրաստած ցուցահանդեսը կբացվի վաղը` ժամը 16:00-ին, և կգործի մինչև սույն թվականի փետրվարի 7-ը:

13.01.2012
Akunq.net