Վանը վերածվել է վրանային տնակների քաղաքի

Վանում հոկտեմբերի 23-ին եւ նոյեմբերի 9-ին տեղի ունեցած ուժգին երկրաշարժերից հետո անօթեւան մնացած բնակչության մեծամասնությունն արտագաղթել է հարավային շրջաններ: Թուրքիայի պատկան կառույցների հավաստիացմամբ` Վանի շրջանում շարունակվող 2500-ից ավելի թույլ եւ ուժեղ հետցնցումների պատճառով քաղաքի բնակֆոնդի 90 տոկոսն այլեւս պիտանի չէ բնակության համար:

Ինչպես հաղորդում է «Արմենպրես»–ը, վկայակոչելով «Անատոլու» գործակալությունը, վախենալով գրեթե ամեն օր տեղի ունեցող հետցնցումներից` քաղաքում մնացած բնակիչները սեփական միջոցներով վրաններ են խփել շենքերի մոտ եւ տեղափոխվել այնտեղ: Վրաններում տարրական կենցաղային եւ անվտանգության պայմանների բացակայության հետեւանքով վրաններում հաճախակի են դարձել հրդեհները, որոնք արդեն բազմաթիվ մարդկանց կյանք են խլել:

Թուրքիայի կառավարությունը օգնության համար դիմել է արտասահմանյան պետություններին` վանեցիների համար վրանային տնակներ ապահովելու խնդրանքով: Վանի փոխնահանգապետ Աթայ Ուսլուն լրագրողներին հայտնել է, որ արտասահմանյան պետություններից արդեն ստացել են 18 հազար վրանային տնակներ` որոնց տեղակայման աշխատանքներն սկսված են: Նա ասել է, որ Վանի եւ երկրաշարժերից տուժած նրա գյուղերի բնակիչների համար անհրաժեշտ է 28 հազար ժամանակավոր տնակներ ձեռք բերել:

«Վանին հարող տարածքում վրանային քաղաք է կառուցվում, որտեղ կարող է տեղավորվել 180 հազար բնակչություն: Ենթադրվում է, որ վրանային քաղաքի տեղակայման աշխատանքներն ավարտվելուց հետո քաղաքից հեռացած բնակչությունը կվերադառնա», -ասել է նա:

Ուսլուի խոսքով` վրանային քաղաքի մասերին տարբեր անուններ են տրվել, այդ թվում` իրաքյան Քրդստանի առաջնորդ Մասուդ Բարզանիի հայր` մոլլա Մուստաֆա Բարզանիի անվամբ հիմնադրամի կողմից կառուցված` «Բարզանիի վրանային քաղաք», «Վանա լիճ», «Ուրարտու», «Շամիրամ», «Տուշպա», «Խոսրով փաշա», կոչվել են նաեւ քուրդ հայտնի գրողների անուններով:

Ոչ պաշտոնական տվյալներով` ներկայում Վանում մի քանի հազար բնակիչներ են մնացել, իսկ նախկինում եղած 40-ից ավելի հյուրանոցներից քաղաքում միայն մեկ հյուրանոց է գործում:

Armenpress.am