Կիրո Մանոյան. Օրինագծի ընդունման հավանականությունը մեծ է

Ֆրանսիայի Սենատում Հայոց ցեղասպանության ժխտումը քրեականացնող օրինագծի քննարկումը եւ քվեարկությունը կայանալու է հունվարի 23-ին կամ 24-ին, Report.am-ի հետ զրույցում տեղեկացրեց ՀՅԴ Հայ Դատի եւ քաղաքական հարցերի գրասենյակի պատասխանատու Կիրո Մանոյանը:

Հիշեցնենք, որ նախորդ տարի՝ դեկտեմբերի 22-ին, Ֆրանսիայի Սենատի Ստորին պալատը կողմ քվեարկեց եւ ընդունեց Հայոց ցեղասպանության ժխտումը քրեականացնող օրինագիծը, որի կապակցությամբ Թուրքիան ետ կանչեց դեսպանին: Այժմ Թահսին Բուրջուօղլուն ետ է վերադարձել` պատճառաբանելով, որ մեծ անելիք ունի՝ Ֆրանսիայի Սենատում փաստաթղթի քվեարկությունը թույլ չտալու համար:

«Անցնող 20 տարիների ընթացում Ցեղասպանության վերաբերյալ տարբեր խնդիրներով Թուրքիան իր դեսպանին ետ կանչել է` խորհրդակցության: Այժմ իրենք արդարացնում են, որ դեսպանը ետ է վերադարձել, որ աշխատանք տանի, որպեսզի Սենատը չորդեգրի օրինագիծը, բայց մեկ է՝ որդեգրելուց հետո էլի են կանչելու, բայց ի վերջո կուղարկեն դեսպանին Ֆրանսիա, որովհետեւ Ֆրանսիայի հետ հարաբերությունները միայն Հայոց ցեղասպանության հարցով չի պայմանավորված»,- նշեց Մանոյանը:

ՀՅԴ Հայ Դատի եւ քաղաքական  հարցերի գրասենյակի պատասխանատուի խոսքով` հավանակնությունը մեծ է, որ օրինագիծը կընդունվի  նաեւ Վերին պալատի կողմից` երկու հիմնական պատճառով: Նախ` հաշվի առնելով, որ ներկայիս Սենատը 6 ամիս առաջվա Սենատը չէ, որ մերժել էր հարցը քննարկել: Ներկայիս Սենատի մեծամասնությունը սոցիալիստներ են եւ (նրանց ղեկավար) Հոլանդը, մինչ Սարկոզիի երեւանյան հայտարարությունները, ասել էր, որ իրենք օրինագիծը կդնեն քննարկման: Եվ երկրորդ` հաշվի առնելով, որ օրինագիծը տարբեր է, այն չէ, ինչ Սենատը մերժել էր` ասելով, որ իրենց լիազորություններից վեր է: Այս օրինագիծը հիմնված է գլխավորապես Եվրոմիության 2008 թ. նոյեմբերի շրջանակային որոշման վրա, որի նպատակն է պայքարել այլատյացության եւ ցեղասպանության դեմ, որը հանձնարարում է  բոլոր ԵՄ երկրներին՝ քրեականացնել Ցեղասպանության ժխտումը: Սենատին, ուրեմն, այլեւս հարց չի մնում: Սարկոզին ինքը շահագրգռված է, որ օրինագիծն ընդունվի, դա էլ՝ երրորդ պատճառ»,- ասաց Կիրո Մանոյանը:

http://report.am/news/politics/kiro-manoyan-fransiayi-senat2.html