Թուրքիոյ Ժողովրդահանրապետական կուսակցութեան առաջնորդ Քեմալ Քըլըչտարօղլուն յայտարարած է, թէ ինք չի վախենար պատգամաւորական անձեռնմխելիութիւնը կորցնելէն: Ինչպէս նախապէս յայտնած էինք, Ստամպուլի շրջանային դատախազութիւնը երէկ Թուրքիոյ խորհրդարանէն պահանջած է պատգամաւորական անձեռմխելիութենէն զրկել Քեմալ Քըլըչտարօղլուն: Թրքական լրատուամիջոցներու հաղորդմամբ` Քըլըչտարօղլուն կը մեղադրուի Թուրքիոյ մէջ 2010ին ռազմական յեղաշրջում նախապատրաստելու առնչութեամբ իրականացուող հետաքննութեան վրայ ազդելու մէջ:
«Ինծի կը մեղադրեն դատական գործընթացին միջամտելու փորձին մէջ: Անոնց արդար դատարանը այն է, որ չհրապարակուած գիրքը յանցագործութիւն կը համարէ եւ կը ձերբակալէ անվճար սորվիլ ուզող ուսանողները: Ես անձեռնմխելիութեան կարքի չունիմ: Նիստէն յետոյ ես անձամբ կը դիմեմ խորհրդարանի Գլխաւոր ասամպլիա: Անոնք, որոնք յանուն ժողովուրդին հանդէս կու գան, վախ չունին: Եթէ դուք կը ցանկանաք հաշուեյարդար տեսնել Ժողովրդահանրապետական կուսակցութեան հետ, զրկեցէք զիս անձեռնմխելիութենէն»,– ըսած է ան:
Քըլըչտարօղլու աւելցնելով ըսած է, որ չի վախենար դատարաններէն եւ դատախազներէն: «Եթէ զիս նոյնիսկ կախաղան ուղարկէք, կ’ըսեմ այն, ինչ գիտեմ»,–ընդգծած է թուրք կուսակցապետը:
Նշենք, որ վերոնշեալ յեղաշրջումը «բացայայտած էր» թուրքական Taraf պարբերականը: Թերթին տուեալներով` Թուրքիոյ զինուած ուժերը 2010-ին մշակած էին «Պալիոզ» (կռան) անունը կրող ծրագիրը, որ նպատակ ունեցած էր, հասարակութեան մէջ քաոսային վիճակ ստեղծելով, տապալել կառավարութիւնը: Այդ ծրագիրին համաձայն` Ստամպուլի Ֆաթիհ եւ Պայազիտ մզկիթներուն մօտ պայթիւններ պէտք է տեղի ունենային, ապա` յարձակում Թուրքիոյ ռազմական թանգարանին վրայ, որմէ յետոյ երկրին զինուած ուժերը պէտք է տապալէին կառավարութիւնը:
Թերթի հաղորդմամբ` 2002–2003-ին մշակուած ծրագիրին տակ դրուած էր Թուրքիոյ զինուորական ուժերու նախկին զօրավար Չեթին Տողանի ստորագրութիւնը: Յեղաշրջումէն յետոյ երկրին մէջ նաեւ զանգուածային ձերբակալութիւններ պէտք է սկսէին:
Leave a Reply