Ստամբուլի «Դպրեվանք» վարժարանը կվերադարձվի հայկական համայնքին

Թուրքիայում 2011 թ. ընդունված այն որոշումից հետո, որ փոքրամասնություններին պատկանող շինությունները պետք է վերադարձվեն իսկական տերերին, կամ դրա դիմաց պետք է փոխհատուցում տրվի նրանց, արդեն ավարտին է մոտենում Ստամբուլի Ուսքյուդար թաղամասում գտնվող «Դպրեվանք» վարժարանը հայկական համայնքին վերադարձնելու գործառույթը: Այս մասին, ինչպես հաղորդում է «Արմենպրես»-ը, հայտնում է թուրքական «Ռադիկալ» թերթը:

Այդ վարժարանում ժամանակին սովորել է 2007 թ. թուրքական ազգայնական շրջանակների կողմից դավադրաբար սպանված Ստամբուլի «Ակօս» թերթի հայազգի խմբագրապետ Հրանտ Դինքը:

Նշվում է, որ վարժարանի` հայկական համայնքին վերադարձնելու գործընթացն ավարտվելուց հետո այնտեղ կարող են սովորել ինչպես Թուրքիայի քաղաքացի, այնպես էլ թուրքական քաղաքացիություն չունեցող հայերի երեխաները:

Armenpress.am