Ծպտված հայերի գոյությունն ապացուցում է Ցեղասպանության փաստը

Թուրքիան առաջ է քաշում Հայոց ցեղասպանությունը հերքող հերթական անհեթեթ փաստարկը: Թուրքիայի պատմագիտական ընկերակցության նախկին նախագահ, ներկայում խորհրդարանի Ազգայնական շարժում կուսակցության պատգամավոր Յուսուֆ Հալաչօղլուն “A Haber” հեռուստակայանի եթերում ասել է, թե Թուրքիայում հայկական 20 տոհմ է ապրում՝ միայն ոչ հայկական ինքնությամբ: Եւ սա պատմաբանին հիմք է տվել եզրակացնելու, որ Թուրքիայում ոչ թե հայերի Ցեղասպանություն, այլ ընդամենն արտագաղթ է եղել:

Հայ պատմաբանները, ի տարբերություն թուրք գործընկերների, ծպտյալ հայերի գոյությունը համարում են Ցեղասպանության ամենախոսուն վկայությունը:

«Ստիպել են, որ մարդիկ մահվան սպառնալիքով փոխեն իրենց կրոնը, եւ ՄԱԿ-ի Ցեղասպանության1948 թվի կոնվենցիայի 5-րդ կետը հատուկ նշում է, որ մեկ էթնիկ կրոնական խմբից այլ էթնիկ կրոնական խումբ տեղափոխելը Ցեղասպանություն է: Թուրքական պատմագրությունը, խոսելով այս մասին, փաստում է, որ տեղի է ունեցել Ցեղասպանություն՝ նաեւ բռնի կրոնափոխության միջոցով»,- ասել է թուրքագետ Ռուբեն Մելքոնյանը:

Արեւմտահայոց հարցերի ուսումնասիրության կենտրոնի տնօրեն Հայկազուն Ալվրցյանը պարզ թվաբանությամբ փորձում է ապացուցել Հալաչօղլուի փաստարկի անհեթեթությունը: 1912-ին Արեւմտյան Հայաստում եւ Թուրքիայի տարբեր բնակավայրերում, պաշտոնական տվյալներով, 2.5-3 մլն հայ էր ապրում: Այսօր Թուրքիայի բնակչությունը 7 անգամ ավելացել է: Հետեւաբար` պետք է աճեր նաեւ հայերի թիվը, եւ ոչ թե խոսվեր հայկական ընդամենը 20 տոհմի գոյության մասին:

Եթե մենք միջին թվով բազմապատկենք հայության թիվը, ապա այսօր Արեւմտյան Հայաստանում եւ Թուրքիայի տարբեր բնակավայրերում պետք է 17-18 մլն հայ ապրեր: Եթե այսօր, իրենց ասելով, 1-1.5 մլն հայ է ապրում, այն էլ ծպտված` այլ ինքնությամբ, սա ապացուցում է, որ մյուս հայերը ոչնչացված են»,- ասաց Հայկազուն Ալվրցյանը։  

Յուսուֆ Հալաչօղլուն հիշատակել է մի քանի հայկական տոհմ, որոնք քրդական անուններ ունեն: Օրինակ` Մամիկոնյանները, Ռշտունիները: Ռուբեն Մելքոնյանն ասում է, սրանք չհիմնավորված փաստեր են:

«Այս տարածքում կա քրդական 2 ցեղախումբ` մամըկա եւ ռեշկոթա: Ենթադրվում է, որ սրանք Ռշտունիներն են ու Մամիկոնյանները, բայց սրա համար լուրջ փաստարկված ապացույցներ, համենայն դեպս ինձ, հայտնի չեն»,- ասաց Ռուբեն Մելքոնյանը։

Թուրք պատմաբանը մանրամասն չի բացատրել եւ չի նշել պատճառները, թե ինչո՞ւ են հայերն ապրում ծպտված` հաճախ քրդի, ալեւիի, բայց ոչ հայի ինքնությամբ:

«Վախենում են»,- բացատրում է Հայկազուն Ալվրցյանը, ով ոչ մեկ անգամ հանդիպել է ծպտյալ հայերի հետ: 

«Պետք է հարց տալ Հարաչօղլուին եւ նրա նման մտածողներին, թե ինչո՞ւ հայության մասին միայն դուք գիտեք, ինչո՞ւ այդ տոհմերի անունները, բնակության վայրը, թվաքանակի մասին տեղեկությունները միայն ձեզ են հայտնի: Սա պետական քաղաքականություն է, որովհետեւ նրանք բոլորը հաշվառված են` որպես ոչ վստահելի տարրեր եւ հսկողության տակ են: Այս է պատճառը, որ այդ հայերը ծպտում, թաքցնում են իրենց գոյությունը»,- մեկնաբանում է Ալվրցյանը։

Ի դեպ, սա` Հալաչօղլուի` Հայոց ցեղասպանությունը հերքելու առաջին փորձը չէ: 2005-ին Ցյուրիխի դատարանը Հալաչօղլուին ձերբակալելու վճիռ էր կայացրել: Թուրք պատմաբանն այդ երկրում հայտարարել էր, թե ոչ մի Ցեղասպանություն էլ չի եղել, ինչը Հայոց եղեռնի իրողությունը ճանաչած Շվեյցարիայում դիտվել էր որպես օրենքի ոտնահարում: Ամիսներ անց նույն մեղադրանքը ներկայացվել եւ հետո արդեն դատավճիռ էր արձակվել նաեւ Թուրքիայի Աշխատավորական կուսակցության առաջնորդ Դողու Փերինչեքի նկատամբ, ով հիմա թուրքական բանտում է` այս անգամ գաղտնի ահաբեկչական «Էրգենեքոն» կառույցի ղեկավար անդամներից մեկը լինելու մեղադրանքով։

Երկիր Մեդիա