Չնայած 2011թ. ընթացքում որեւէ նոր երկիր չի ճանաչել Հայոց ցեղասպանությունը, այդ հարցում, այնուամենայնիվ, կա որոշակի առաջընթաց: Այդ մասին NEWS.am-ի թղթակցի հետ զրույցում ասել է Հայաստանի ԳԱԱ Արեւելագիտության ինստիտուտի տնօրեն, պրոֆեսոր Ռուբեն Սաֆրաստյանը:
Նա հիշեցրել է, որ Ցեղասպանության 96-րդ տարելիցի նախօրեին Արգենտինայի խորհրդարանի Վերին պալատը դատապարտող բանաձեւ ընդունեց: ԱՄՆ Կոնգրեսի Ներկայացուցիչների պալատը ընդունեց թիվ 306 բանաձեւը «Թուրքիայում ազգային փոքրամասնությունների կրոնական ունեցվածքի վերադարձման մասին»: «Այդ ամենը վկայում է այն մասին, որ ցեղասպանության ճանաչման գործընթացը առաջ է ընթանում, եւ, կարծում եմ, մենք պետք է հաշվի առնենք հանգամանքը, որ գործընթացը տեւական բնույթ ունի եւ չի շեղվում նախանշված ուղուց»,- ասել է Սաֆրաստյանը:
«Ցեղասպանության ճանաչման գործընթացում անհրաժեշտ է ճկունություն դրսեւորել, բայց դա այս կամ այն երկրում հայկական լոբբիի գործն է, եւ նրանք կարողանում են ճիշտ ընտրել ժամանակը: Ըստ երեւույթին, նախապես իմանալով, որ ճանաչման նախաձեռնությունը ձախողված է, լոբբիի ներկայացուցիչները համարում են, որ անգամ քննարկումը կարեւոր գործոն է»,- նշել է թուրքագետը:
Այս համատեքստում Սաֆրաստյանը ընդգծել է կարեւորությունը Հայաստանի նախագահի այն հայտարարության, թե վաղ թե ուշ Թուրքիան կունենա այնպիսի ղեկավարություն, որը գլուխ կխոնարհի Ծիծեռնակաբերդում:
Leave a Reply