Որևէ մեկն իրավունք չունի ալժիրցիների թափած արյան հաշվին սեփական գործերն առաջ տանել. Ալժիրի վարչապետ

Ալժիրի վարչապետ Ահմեդ Օյահյան Թուրքիային կոչ է արել այլևս չշահարկել Ալժիրում Ֆրանսիայի գաղութատիրության ժամանակաշրջանում (1830—1962թթ.) ալժիրցիների սպանության հարցը։

Ինչպես հաղորդում է անգլալեզու Middle-east-online.com կայքը, վարչապետը նման հայտարարությամբ հանդես է եկել Ֆրանսիայի Սենատի կողմից Հայոց ցեղասպանության ժխտումը քրեականացնող օրենքի քննարկման նախաշեմին։

Ֆրանսիայի Ազգային ժողովն անցած ամիս ձայների ճնշող մեծամասնությամբ ընդունեց Հայոց ցեղասպանության ժխտումը քրեականացնելու մասին օրինագիծը։ Նոր օրինագծի համաձայն՝ Ֆրանսիայում Հայոց ցեղասպանությունը ժխտողներին մինչև 1 տարվա ազատազրկում է սպառնում և 45.000 եվրո տուգանք։ Դրանից անմիջապես հետո Թուրքիայի վարչապետ Ռեջեբ Թայիբ Էրդողանը Ֆրանսիային մեղադրեց 20–րդ դարի կեսերին ալժիրցիների ցեղասպանության մեջ։

«Ալժիրի բնակչության 15 տոկոսը 1945թ. ի վեր ոչնչացվեց ֆրանսիացիների կողմից։ Դա ցեղասպանություն է»,–հայտարարել էր Էրդողանը։

Նշենք, որ Ֆրանսիայի գաղութատիրության դեմ 1954–1962թթ. ալժիրցիների մղած պայքարում, արաբ պատմաբանների տվյալներով, մեկ միլիոնից ավելի մարդ է զոհվել։

Ալժիրի վարչապետը հավելել է, որ յուրաքանչյուր երկիր իրավունք ունի պաշտպանել իր շահերը, սակայն «որևէ մեկն իրավունք չունի ալժիրցիների թափած արյան հաշվին սեփական գործերն առաջ տանել»։

Վարչապետը ընդգծել է, որ Ալժիրում պատերազմի ժամանակ Թուրքիան ՆԱՏՕ–ի անդամ է եղել և որպես այդպիսին` նյութական աջակցություն է ցուցաբերել Ֆրանսիային։

«Մենք մեր թուրք ընկերներին ասում ենք՝ դադարեցրեք քաղաքական նպատակներով շահարկել գաղութատիրության հարցը»,–մամուլի ասուլիսի ժամանակ հայտարարել է Օյահյան։

http://tert.am/am/news/2012/01/09/turkeyalgeria/