«Հայոց ցեղասպանության ժխտումը քրեականացնող օրինագծի ընդունումը Ֆրանսիայի կողմից նշանակում էր, որ Ֆրանսիայի խորհրդարանի անդամները որոշեցին ցույց տալ, որ Ֆրանսիան մնում է եվրոպական արժեքների դավանողներից մեկը»,- այսօր լրագրողների հետ հանդիպման ժամանակ ասաց ՀՀ ԳԱԱ Արևելագիտության ինստիտուտի տնօրեն Ռուբեն Սաֆրաստյանը:
Նրա խոսքով` այդ իրադարձությունն ունի իր արտաքին և ներքին քաղաքական դրդապատճառները, մասնավորապես այն, որ Ֆրանսիան մտնում է նախընտրական շրջան, որ Թուրքիան չի կարողանում ապացուցել Եվրոպային, որ ինքը դավանում է եվրոպական արժեքներ, և վերջապես, որ ՀՀ-ն և Ֆրանսիան վերջին ժամանակներում սերտացրել են իրենց հարաբերությունները:
«Հայոց ցեղասպանության միջազգային դատապարտման և ճանաչման գործում մենք կունենանք առաջընթաց հատկապես եվրոպական երկրներում, բայց որ Թուրքիան կփոխի իր մերժողական վերաբերմունքը, ես դա չեմ տեսնում»,- ասաց Ռուբեն Սաֆրաստյանը` հավելելով, որ միջազգային հանրության ճնշումը Թուրքիայի վրա ինչ-որ տեղ դեր խաղում է, սակայն ոչ միշտ է արդյունք տալիս, քանի որ Թուրքիան պահպանում է տարրեր կայսերական Թուրքիայի ժամանակաշրջանից, երբ որոշումներ ընդունվում են` գերիշխանությունը պահպանելու և դիրքերը չզիջելու նկատառումներից ելնելով։
Մեկնաբանելով թուրք-ֆրանսիական հարաբերությունների հնարավոր վատթարացումը՝ Ռուբեն Սաֆրաստյանը կարծիք հայտնեց, որ այդ հարաբերությունների վատթարացումից կտուժի առաջին հերթին Թուրքիան, քանի որ նա տնտեսապես կախված է Ֆրանսիայից:
Նրա խոսքով` մինչ Ֆրանսիայի Սենատը կընդունի Հայոց ցեղասպանության ժխտումը քրեականացնող համապատասխան օրենքը, և մինչ Սարկոզին կստորագրի այն, իրադրությունը շատ ծանր կլինի Թուրքիայում ապրող հայերի համար:
«Իհարկե, կարող է բարձրանալ հակահայկական ալիք Թուրքիայում, սակայն այդ օրինագիծը ընկալել որպես խոսքի ազատ արտահայտման սահմանափակում, կոպիտ սխալ է»,- ասաց Ռուբեն Սաֆրաստյանը։ Նա հիշեցրեց, որ Ֆրանսիայում Հոլոքոստի ժխտումը քրեականացնող օրենք նույնպես կա, և հանցագործությունը ժխտելու երևույթը պետք չէ կապել խոսքի իրավունքի սահմանափակման հետ:
http://tert.am/am/news/2011/12/26/rubensafrastyan/
Leave a Reply