Կարսում հուշարձանների «ցեղասպանություն» է

Կարսում հայ-թուրքական բարեկամությունը խորհրդանշող «Մարդկության հուշարձանի»` Թուրքիայի վարչապետ Թայիբ Էրդողանի հրահանգով քանդելուց հետո այլ հուշարձանների հետ կապված ճգնաժամ էլ է առաջացել:

Ինչպես հաղորդում է «Արմենպրես»-ը` վկայակոչելով թուրքական «habera.com» լրատվական կայքը, անհայտ անձինք դեկտեմբերի 22-ի գիշերը շրջել են Թուրքիայի մշակույթի եւ զբոսաշրջության նախարարության կողմից Կարսի գեղեցիկ արվեստների ցուցասրահի պուրակում տեղադրված տարվա չորս եղանակները խորհրդանշող` 2003-ին Բելգիայից բերված 4 արձաններից «Ամառը»: Կարսի քաղաքապետարանին պատկանող արձանը տապալելու պատճառը հայտնի չէ:

Կարսի նախկին քաղաքապետ Նաիֆ Ալիբեյօղլուն այդ կապակցությամբ լրագրողներին ասել է, որ Կարսի հուշարձանների նկատմամբ «ցեղասպանություն» է իրագործվում: «Կարսում արդեն քանդել են իմ ղեկավարման ժամանակաշրջանում տեղադրված «Մարդկության հուշարձանը», ներկայում Հեյդար Ալիեւի պուրակում գտնվող բազմաթիվ` արվեստի նմուշ հանդիսացող արձանները, այժմ էլ քանդում են Բելգիայից բերված նվազագույնը 100-ամյա այդ արձանները: Այդ գործողություններն անմարդկային են: Եթե «Մարդկության հուշարձանը» քանդված չլիներ, այժմ մենք կարող էինք հպարտանալ նրանով եւ ֆրանսիացիներին ցույց տալ, որ մենք ցեղասպանություն չենք արել, կողմ չենք պատերազմներին եւ կողմ ենք մարդկությանը: Բայց այս բոլոր գործողությունները հակառակն են ապացուցում», -ասել է նա:

Այս ընթացքում հայտնի է դարձել, որ Կարսում հարձակում է տեղի ունեցել նաեւ Ն.Ալիբեյօղլուի կողմից Ինոնյույի պողոտայում դրված ժողովրդական աշուղների արձանների վրա եւս: Անհայտ մարդկանց կողմից դեկտեմբերի 23-ին կատարված հարձակման արդյունքում այլ արձանների հետ վնասվել է նաեւ թուրք աշուղ Շերեֆ Թաշլըովայի ձեռքի սազը:

Armenpress.am