Յըլմազ Օզդիլ
1972…
Ֆրանսիայում տեղադրվեց Ցեղասպանության առաջին հուշարձանը: Ֆրանսիայում մեր արտակարգ և լիազոր դեսպան Հասան Էսաթ Ըշըքը վերադարձավ Թուրքական ավիաուղիներ ընկերության առաջին իսկ ինքնաթիռով: Հետո տեսանք, որ Ֆրանսիան ասում է` «Je m’en fous!» («Ես թքած ունեմ»` ֆրանսերենով)… Թուրքիան շրջադարձ արեց. մեր արտգործնախարարը զանգահարեց Ֆրանսիայի արտգործնախարարին և ասաց` ուզում ենք ուղարկել մեր դեսպանին, Ֆրանսիայի նախարարն էլ պատասխանեց. «Դուք գիտեք, ինչպես կուզեք»: Մեր արգործնախարարի տրամադրությունը տեղն ընկավ, բացեց հուշարձանի հարցը, ասաց. «Անհանգստացնում է մեր քաղաքացիներին, առաջը մի ծառ տնկենք, որ չերևա, ի՞նչ կասեք»: Եվ գիտե՞ք` ինչ պատասխան տվեց Ֆրանսիայի արտաքին գործերի նախարարը` «Այդ գործով ես չեմ զբաղվում, Անտառապահության մեր նախարարի հետ քննարկեք»:
*
2001…
Ֆրանսիան ճանաչեց ցեղասպանությունը: Փարիզի մեր արտակարգ և լիազոր դեսպան Սյոնմեզ Քյոքսալը վերադարձավ Թուրքական ավիաուղիներ ընկերության առաջին իսկ ինքնաթիռով: «Adieu» ասվեց, այսինքն` «Մնաս բարով»… Հետո տեսան, որ ֆրանսիացիները ինչպես որ մեզ չեն շոյում, այնպես էլ ձեռք անգամ չեն թափահարում մեր հետևից. շրջադարձ կատարվեց, և մեր արտակարգ ու լիազոր դեսպանը կարճ և արագ քայլերով հետ վերադարձավ:
*
2006…
Ֆրանսիան փորձեց ցեղասպանությունը ժխտողներին ազատազրկում նախատեսող օրենքն անցկացնել: Փարիզում մեր արտակարգ և լիազոր դեսպան Օսման Քորություրքը վերադարձավ Թուրքական ավիաուղիներ ընկերության առաջին իսկ ինքնաթիռով: Մինչև ձուն դեմ չառնի, ածելու տեղ չփնտրող Թուրքիան մեկ էլ տեսավ, որ ձուն դարակի մեջ է դրվել… Մեր արտակարգ և լիազոր դեսպանը հետ ուղարկվեց` թույլ եփած ձվի պես:
*
2006…
Կանադան չսահմանափակվեց ցեղասպանության ճանաչմամբ. դրա մասին դաս մտցրեց պետական դպրոցներում: Օտտավայում մեր արտակարգ ու լիազոր դեսպան Այդեմիր Էրմանը վերադարձավ Թուրքական ավիաուղիներ ընկերության առաջին իսկ ինքնաթիռով: Հետո տեսան, որ իրենց դրածները չեն հանում, ասացին` գոնե մենք մեր հանածները դնենք, և մեր դեսպանը հետ ուղարկվեց:
*
2007…
ԱՄՆ Ներկայացուցիչների պալատը ճանաչեց ցեղասպանությունը: Վաշինգտոնում մեր արտակարգ և լիազոր դեսպան Նաբի Շենսոյը վերադարձավ Թուրքական ավիաուղիներ ընկերության առաջին իսկ ինքնաթիռով:
Անկարայում վառելանյութ լցրեցին ինքնաթիռ, և դեսպանը հետ ուղարկվեց Թուրքական ավիաուղիներ ընկերության առաջին իսկ ինքնաթիռով:
*
(Ցեղասպանությունն առաջինը ճանաչած երկիրը Ուրուգվայն է…
Դեռ այնտեղից ենք ստանում անգուսյան եզները):
*
(Արգենտինան ճանաչել է ոչ թե երկու-երեք, այլ յոթ անգամ… Մեզ «մարդու մսագործ» հռչակած Արգենտինայի նախագահը վերջերս Թուրքիա եկավ, որպես պատվավոր հյուր ընդունվեց Չանքայայում (Թուրքիայի Հանրապետության նախագահի նստավայրը` Անկարայում-Ակունքի խմբ.), ասաց. «Արտգործնախարարս հենց նոր դրեց իր ստորագրությունը. 80 միլիոն դոլարի չափով «եզ» ենք ուղարկելու Թուրքիա»):
*
2009…
Ցեղասպանության զոհերի ոգեկոչման երեկո կազմակերպվեց Կանադայում, որին պաշտոնապես մասնակցեց նաև Կանադայի կառավարությունը: Օտտավայում մեր արտակարգ և լիազոր դեսպան Ռաֆեթ Աքգյունայը վերադարձավ Թուրքական ավիաուղիներ ընկերության առաջին իսկ ինքնաթիռով: Հետո տեսան, որ ամենայն հավանականությամբ առնվազն մեկ տարի նման հիշատակի երեկույթ չի կազմակերպվի, մինչև մյուս տարի արդեն իսկ մեր բնակչությունը վաղուց մոռացած կլինի այդ մասին, և մեր դեսպանը հետ ուղարկվեց:
*
2010…
Ցեղասպանությունը ճանաչեց Շվեդիան: Ստոկհոլմում մեր արտակարգ և լիազոր դեսպան Զերգուն Քորոթյուրքը վերադարձավ Թուրքական ավիաուղիներ ընկերության առաջին իսկ ինքնաթիռով: Հետո մտածեցին…` Եղբա’յր, մինչ այդ էլ դարձյալ Քորոթյուրք ազգանվամբ մեր մյուս արտակարգ ու լիազոր դեսպանին էլ հետ չկանչեցի՞նք ու դարձյալ հետ չուղարկեցի՞նք: Ուղարկեցինք… Էեե, եթե այդպես է, այս Քորոթյուրքին ինչու չուղարկենք որ: «Տո կեցցե~ս» ասվեց… Այս դեսպան Քորոթյուրքն էլ հետ ուղարկվեց:
*
2010…
ԱՄՆ Ներկայացուցիչների պալատը մեկ անգամ էլ ճանաչեց ցեղասպանությունը: Վաշինգտոնում մեր արտակարգ և լիազոր դեսպան Նամըք Թանը վերադարձավ Թուրքական ավիաուղիներ ընկերության առաջին իսկ ինքնաթիռով: Անկարայում վառելանյութ լցրեցին ինքնաթիռ, և դեսպանը հետ ուղարկվեց Թուրքական ավիաուղիներ ընկերության առաջին իսկ ինքնաթիռով:
*
2011…
Ֆրանսիան չսահամանափակվեց ցեղասպանության ճանաչմամբ. նաև ընդունեց ցեղասպանությունը հերքողներին ազատազրկում նախատեսող օրենքը: Փարիզում մեր արտակարգ և լիազոր դեսպան Թահսին Բուրջուօղլուն` ենթադրաբար Թուրքական ավիաուղիներ ընկերության առաջին իսկ ինքնաթիռով…
Յըլմազ Օզդիլ
23.12.2011
Հյուրիեթ
Թարգմանությունը` Մելինե Անումյանի
Akunq.net
Leave a Reply