Թուրքական «Հյուրրիյեթ» (Hurriyet) օրաթերթը հրապարակել է իր սուր քննադատական գրչով հայտնի լրագրող Յըլմազ Օզդիլի հեղինակած հոդվածը, որտեղ դիտարկվում են Ֆրանսիայի հանդեպ Թուրքիայի վարչապետ Թայիփ Էրդողանի պահվածքն ու խոսքերը` կապված Հայոց ցեղասպանության բանաձևն օրակարգ բերելու հետ:
Էրդողանը, քննադատելով ֆրասիական իշխանությունների հայանպաստ նախաձեռնությունը, ասել էր, որ Սարկոզիի վարչակազմը նախ` թող լույս սփռի Ալժիրում ու Ռուանդայում կազմակերպված ջարդերի վրա:
Ի պատասխան Էրդողանի այս բողոքին` թուրք լրագրողը նկատել է, տալիս, որ Ֆրանսիան ու Ալժիրը հիմա բնականոն ու բարիդրացիական հարաբերությունների մեջ են: Ավելին` Ֆրանսիայի ֆուտբոլի ազգային հավաքականի 17 ալժիրցի ֆուտբոլիստի շնորհված է Ֆրանսիայի քաղաքացիություն:
«Եվ տվողն է գոհացած, և վերցնողը: Քո ի՞նչ բանն է Ալժիրը, այ Ալլահի ապուշ,- գրում է թուրք լրագրողը` շարունակելով.-Դու ավելի լավ է պատասխանիր, թե ինչո՞ւ է այժմ Այնթափը կոչվում Գազիայնթափ (Գազի-հավատի համար կռվող մարտիկ), Մարաշը` Քահրամանմարաշ (քահրաման-հերոս), Ուրֆան` Շանլըուրֆա (շանլը- հարգարժան):
Հոդվածագիրը հարցնում է, թե ինչու են եղել այդ հավելյալ ածականները: Ըստ նրա` Ֆրանսիային քննադատելու փոխարեն պետք է հասկանալ, որ ապացույցը Այնթափն է, ապացույցը Մարաշն է, ապացույցը Ուրֆան է:
«Ո՞վ էր երեկ զենքի ուժով հաստատվում այդ քաղաքներում: Յոթ թզուկնե՞րը: Մի՞թե «մեր ցեղին սպանել են» ասող հայերն էին զինվորական համազգեստ հագած կոտորում մարդկանց»,- գրում է Օզդիլը` հիշեցնելով նաև աշխարհահռչակ թուրք վիպասան Օրհան Փամուքի հետ կատարվածը. Սկզբում Էրդողանը նրան հարգում-պատվում էր, իսկ երբ Փամուքը բարձրաձայնեց հայոց ջարդերի մասին, նրան սկսեցին հետապնդել:
Հոդվածագիրը Էրդողանին խորհուրդ է տալիս ամոթանք չտալ ուրիշին, երբ սեփական արարքներն են ամոթալի` եզրափակելով այսպես. «Բռնաբարում ես ու ապտակ հասցնում և այդքանից հետո ի՞նչ ես ակնկալում, ֆրանսիական համբու՞յր»:
http://www.panorama.am/am/society/2011/12/22/erdoghan/
Leave a Reply