Քուրդ պատգամավորը խորհուրդ է տալիս Թուրքիային` ուրիշների փոխարեն Հայկական հարցը քննարկել սեփական խորհրդարանում

Ֆրանսիայի ԱԺ-ում Հայոց ցեղասպանության ժխտման համար 1 տարի ազատազրկում եւ 45 հազար եվրո տուգանք վճարելու պատիժ սահմանող օրինագիծն ընդունվելուն պես` Անկարայում անմիջապես մեծացան Փարիզի նկատմամբ հակազդումները:

Ինչպես հաղորդում է «Արմենպրես»–ը, վկայակոչելով CnnTurk լրատվական գործակալությունը, Թուրքիայի փոխվարչապետ Բյուլենթ Առինչն այդ կապակցությամբ հայտարարել է, թե հայկական օրինագծի ընդունումը Ֆրանսիայի ԱԺ-ի կողմից «պատմությունն ու ճշմարտությունները սեւացնելու գործողություն է»: Սեփական քուրդ, ալեւի, հայ, ասորի, հույն քաղաքացիների դեմ գազանությունները շարունակող Թուրքիայի փոխվարչապետը ոչ ավել, ոչ պակաս` հայտարարել է, թե իր «այդ քայլով Ֆրանսիան վերադառնում է ինկվիզիցիայի դարաշրջան»:

Օրինագծի ընդունման պատճառով Փարիզը լքող Ֆրանսիայում Թուրքիայի դեսպան Թահսին Բուրջուօղլուն լրագրողներին ասել է, թե «օրինագծի ընդունումով մեծ հարված հասցվեց թուրք-ֆրանսիական հարաբերություններին»:

Կոշտ հայտարարություններով են հանդես եկել նաեւ Թուրքիայի ընդդիմադիր Ժողովրդահանրապետական (ԺՀԿ) եւ Ազգայնական շարժում (ԱՇԿ) կուսակցությունները: ԺՀԿ առաջնորդ Քեմալ Քըլըչդարօղլուն հայտարարել է, որ «այդ որոշումով Ֆրանսիան դավաճանել է իր սեփական պատմությանը»: ԱՇԿ խորհրդարանական խմբակցության փոխնախագահ Մեհմեդ Շանդարն էլ հայտարարել է, թե հայկական նախագծի հարցում Ֆրանսիայի խորհրդարանի համառությունն ընդունում են որպես «Թուրքիայի եւ թուրք ազգի դեմ թշնամություն»:

Հատկանշական է, որ հայկական օրինագծի վերաբերյալ Ֆրանսիայի խորհրդարանի որոշումը չի դատապարտել միայն Թուրքիայի խորհրդարանում 35 պատգամավորներ ունեցող միակ քրդական Խաղաղություն եւ ժողովրդավարություն կուսակցությունը (ԽԺԿ): ԽԺԿ խորհրդարանական խմբակցության փոխնախագահ Հասիբ Քափլանը լրագրողներին ասել է. «Թուրքիայի իշխանավորների կողմից Ֆրանսիայի դեմ նման էժանագին հակադարձումները ոչ մի հարց էլ չեն կարող լուծել»:

«Մոտենում է 2015-ը (Հայոց ցեղասպանության 100 ամյա տարելիցը): Իրադարձությունը ձնագնդի նման մեծանալու է, եւ շատ երկրներ են հետեւելու Ֆրանսիայի օրինակին: Թուրքիան խնդիրներ ունի իր սեփական ժողովրդի հետ: Հիշեք Դերսիմի, Մարաշի, Մալաթիայի կոտորածները, 1990-ականների կոտորածները: Ավելի լավ է` Թուրքիայի խորհրդարանը քաջություն դրսեւորի եւ ինքը քննարկի այդ հարցը: Հիտլերյան ֆաշիզմի դեմ Գերմանիան քաջություն ունեցավ այնպիսի որոշումներ ընդունել, որ այսօր ոչ ոք նրան չի մեղադրում», -ասել է քուրդ պատգամավորը եւ որ խորհուրդ է տվել Թուրքիային` հետեւել Գերմանիայի օրինակին:

Armenpress.am