Թուրքիայի ՆԳ նախկին նախարարը խոստովանել է, որ Մարաշի կոտորածը պետության գործն է

1978-ին սուննի Թուրքիայի կառավարությունը Մարաշում բնակվող իր ալեւի քաղաքացիների դեմ կոտորած է իրագործել:

Ինչպես հաղորդում է «Արմենպրես»–ը, այս պատմական խոստովանությունը «Հաբերթուրք» հեռուստաալիքի թղթակից Բալչիչեք Իլթերի հետ զրույցում արել է Թուրքիայի ներքին գործերի նախկին նախարար Ֆեհմի Գյունեշը, ով իրադարձությունից անմիջապես հետո փոխարինել է հրաժարական տված, այն ժամանակվա նախարար Իրֆան Օզայդընլըին:

«Մարաշում արտակարգ դրություն հայտարարվելուց 15 օր հետո խորհրդարանական պատվիրակության կազմում մեկնեցի այնտեղ: Քաղաքը պատերազմական դաշտ էր հիշեցնում: Բառեր չեմ գտնում նկարագրելու, թե ինչ սարսափելի տեսարաններ էին: Ամենուրեք ավերածություններ, այրված եւ քանդված տներ էին: Մարաշից մահվան հոտ էր գալիս: Հիվանդանոցները լեփ-լեցուն լինելու պատճառով վիրավորներին տեղավորել էին մարզադահլիճներում եւ դպրոցներում: Լեզուս կապ էր ընկել, եւ ես չգիտեի` ինչ պատասխանել մի տարեց կնոջ, որն ինձ հարցրեց, թե ինչու այսպես վարվեցինք նրանց հետ: Մարաշում մեծ հանցագործություն, կոտորած է իրագործվել, եւ այդ կոտորածն արել է պետությունը` իր Ազգային հետախուզական կազմակերպության (MIT) գործակալների եւ վարձկանների միջոցով: Մարդկանց կենդանի-կենդանի այրել են, երեխաներին լցրել եռացող կաթսաների մեջ: Մարդկանց գազանաբար սպանել են պատահած սուր գործիքով, բարձրացել են ծառերին եւ այնտեղից կրակ բացել բոլորի վրա` չխնայելով ծեր եւ մանուկ: Դա արվեց Բյուլենթ Էջեւիթի վարչապետության եւ Ֆահրի Քորութուրքի նախագահության ժամանակ: Կոտորածին չխանգարեցին ոչ Մարաշի նահանգապետը, ոչ ոստիկանապետը, ոչ էլ որեւէ իրավասու: Եվ դա միայն նրա համար, որ այդ մարդիկ ալեվի դավանանքի էին», -խոստովանել է թուրք նախարարը:

22.12.2011

Armenpress.am