Քանի միլիոն թուրք և քուրդ է բնակվում Թուրքիայում. թարմ տվյալներ` KONSENSUS հետազոտությունների կենտրոնից

KONSENSUS հետազոտությունների կենտրոնի կողմից իրականացված “Թուրքիայի օրակարգը. պատկերը Թուրքիայում 2011 թ. դեկտեմբերին` 2012 թ. շեմին” վերնագրով ուսումնասիրության վերջին` երրորդ բաժնում, որն ընդգրկում է 2009 թ. նոյեմբերից մինչև 2011 թ. դեկտեմբերն ընկած ժամանակահատվածը, տեղ են գտել ուշագրավ եզրահանգումներ: Թուրքական լրատվամիջոցների համաձայն` KONSENSUS հետազոտությունների կենտրոնը նշյալ ժամանակահատվածում 32.482 հոգու ուղղել է հետևյալ հարցը. “Որն է այն էթնիկ ծագումը, որին Դուք պատկանում եք` ըստ Ձեր զգացողության”: 392 հոգի չի կարողացել որևէ պատասխան տալ այդ հարցին` ի տարբերություն 32 հազար 90 հոգու:

Սույն հետազոտության ժամանակ հիմք է ընդունվել Թուրքիայի վիճակագրական ընկերության կողմից 2010 թ. կատարված մարդահամարը, ըստ որի` Թուրքիայի բնակչության թիվը կազմում է 73 միլիոն 722 հազար 988 մարդ: Հետազոտության արդյունքների համաձայն` իրենց թուրք համարողների թիվը Թուրքիայում 57 միլիոն 89 հազար 942 է, իսկ քուրդ համարողներինը` 8 միլիոն 693 հազար 293: Երրորդ տեղում են լազերը, որոնց թիվը Թուրքիայում կազմում է 1 միլիոն 656 հազար 412 հոգի:

Ինչպիսի էթնիկ պատկեր է Թուրքիայի այնպիսի քաղաքներում, ինչպիսիք են Ստամբուլը, Անկարան, Իզմիրն ու Դիարբեքիրը:  Ըստ հետազոտության արդյունքների` ծագմամբ իրենց թուրք համարողները Ստամբուլում կազմում են քաղաքի բնակչության 81,95 տոկոսը: Քրդերն այստեղ 6,69 տոկոս են: Ինչ վերաբերում է Դիարբեքիրին, ապա քրդերն այստեղ իրենց թվով առաջին տեղում են` 75 տոկոս: Թուրքերի թիվը Դիարբեքիրում կազմում է այստեղի բնակչության ընդամենը 15,9 տոկոսը: Դերսիմում իրենց ալևի լինելը բացահայտել համարձակվողների թիվն էլ հասել է 15,2 տոկոսի:

KONSENSUS հետազոտությունների կենտրոնի կատարած ուսումնասիրության համաձայն` հարցախույզի մասնակիցների 15,7 տոկոսն ընդունում է, որ քրդերը Թուրքիայում ենթարկվում են խտրականության:

KONSENSUS-ը նաև փորձել է գտնել հետևյալ հարցի պատասխանը. Թուրքիայի որ շրջաններում որ էթնիկ խմբին պատկանող քաղաքացիներն են մեծամասնություն կազմում: Ըստ հետազոտության` այն շրջանը, որն առավել հոծ է բնակեցված իրենց թուրք համարող քաղաքացիներով, Ներքին Անատոլիան է: Ինչ վերաբերում է իրենց քուրդ համարողներին, ապա վերջիններս առավելապես բնակվում են Հարավարևելյան Անատոլիայում:

“Ըստ Ձեզ` ՊԿԿ-ն ձգտում է արդյոք մի նոր պետություն հիմնել” հարցին հարցախույզի մասնակիցների 62,9 տոկոսը դրական պատասխան է տվել:

KONSENSUS-ը նաև պարզել է, որ կին մասնակիցների 57 տոկոսը վախենում է խավարին դուրս գալ փողոց: Հետազոտության արդյունքների համաձայն` գիշերը փողոց դուրս գալուց ամենաշատը վախենում են Թուրքիայի Միջերկրածովյան շրջանի կին բնակիչները, իսկ ամենաքիչը` Հարավարևելյան Անատոլիայի:

21.12.2011

Akunq.net