Կարսում հայ եւ թուրք ժողովուրդների բարեկամությունը խորհրդանշող «Մարդկության» արձանի` այն «անճոռնի» բնութագրած Թուրքիայի վարչապետ Ռեջեբ Թայիբ Էրդողանի հրահանգով քանդելու եւ մնացորդները Կարսի քաղաքապետարանի անպետք իրերի հավաքատեղի նետելու վերաբերյալ արձանի հեղինակ, թուրք հայտնի քանդակագործ Մեհմեդ Աքսոյը հայտարարել է, որ «արձանն աղբանոց նետած իշխանությունները մարդկությունից եւ արվեստից հեռու մարդիկ են»:
Ինչպես հաղորդում է «Արմենպրես»–ը, թուրքական «Վաթան» թերթի հետ զրույցում Աքսոյն ասել է, որ թուրքական օրենքներով` որպես արձանի հեղինակ, իր իրավունքները պաշտպանել չկարողանալու համար պատրաստվում է դիմել Մարդու իրավունքների եվրոպական դատարան` արձանը գազանաբար ջարդուփշուր անելու համար Կարսի քաղաքապետարանից փոխհատուցում ստանալու պահանջով:
«Կարսի քաղաքապետարանը ոտնահարել է իմ հեղինակային իրավունքը: Ես վերականգնելու եմ այդ արձանը, որպեսզի ժամանակ անց մարդիկ տեսնեն, թե ինչպես են վարվել թուրքական իշխանությունները ժողովուրդների միջեւ բարեկամությունը խորհրդանշող արձանի հետ: Արձանի մնացորդներն աղբատեղի նետելու գործողությունները ցույց են տալիս, թե ինչքան հեռու են իշխանությունները մարդկությունից եւ արվեստից», -ասել է թուրք քանդակագործը:
19.12.2011
Armenpress.am
Leave a Reply