Թուրքիայում տեղի է ունեցել ապրիլի 24-ին հայ զինվորի սպանության գործով հերթական դատավարությունը

Դիարբեքիրի օդուժերի հրամանատարության զինվորական դատարանում դեկտեմբերի 16-ին տեղի է ունեցել 2011-ի ապրիլի 24-ին զինակցի կողմից սպանված հայազգի զինվոր Սեւակ Շահին Բալըքչի գործով 3-րդ դատական նիստը։

Firat գործակալության փոխանցմամբ՝ հերթական դատական նիստի ժամանակ դատարանը որոշում է կայացրել՝ սպանության պահին դեպքի վայրում գտնվող ականատես զինվորներից վկայություններ վերցնել, ուսումնասիրել տեղանքը եւ հաջորդ դատական նիստը տեղափոխել 2012-ի մարտի 27-ին։

Դատական նիստին ներկա են եղել Սեւակի ծնողները՝ Անի Բալըքչըն եւ Կարապետ Բալըքչըն, մորեղբայրը եւ փաստաբանները, ինչպես նաեւ հայազգի զինվորին սպանած Քվանչ Աղաօղլուն, ում դատարանը ազատ էր արձակել հենց առաջին դատական նիստի ժամանակ։

Նշենք, որ Սեւակի զորացմանը մնացել էր 23 օր։  Ապրիլի 24-ի առավոտյան նա սպանվել է մեկ այլ զինծառայող` Քվանչ Աղաօղլուի կողմից: Սպանության հետ կապված ժանդարմերիան հայտարարել է, որ սպանությունը տեղի է ունեցել ծառայակից ընկերոջ հետ կատակ անելու ժամանակ, իբր, պատահաբար արձակված կրակոցից։ Սեւակի ծնողները պնդում են, որ իրենց որդուն սպանել են ազգայնականության հողի վրա՝ հայ լինելու համար։

Դատարանը հենց առաջին դատական նիստին ազատ է արձակել Քվանչ Աղաօղլուին` նշելով, թե նա փախչելու առիթ չունի: Դիարբեքիրի զինվորական դատարանում բարձրաստիճան մի զինվորական, ում անունը չի հայտնվում,  հայտարարել է, թե Սեւակի սպանությունից հետո  ականատես մի զինվոր մոտեցել է  իրեն` ասելով, թե Քվանչ Աղաօղլուն Սեւակին ասել էր. «Թմբլիկ, քեզ սպանելու եմ»:  Սակայն դատին ներկա մյուս զինվորականները հերքել են այս խոսքերը:

Ռազմական դատախազության կողմից պատրաստված մեղադրականում Քվանչ Աղաօղլուի համար պահանջվում է ընդամենը 9 տարվա ազատազրկում՝ «անփոթության հետեւանքով մարդ սպանելու համար»:

http://news.am/arm/news/86122.html