Ադանայում «Նորածնի եկեղեցի» անվամբ հայտնի Սրբ Պողոս եկեղեցու վրա հարձակված երկու թուրքերի համար Ադանայի հանրապետական դատախազությունը 4-ական տարվա ազատազրկման պատիժ է պահանջել:
Ինչպես հաղորդում է «Արմենպրես»–ը, վկայակոչելով «Hyetert»-ը, 26-ամյա Սերհադ Էրօղլուն եւ 25-ամյա Իբրահիմ Քարաօղլուն ապրիլի 21-ին 72,5 սմ երկարությամբ թրով եւ ծալովի դանակով զինված մտել են եկեղեցի եւ պահանջել, որ իրենց մոտենա եկեղեցու քահանան: Իմանալուց հետո, որ քահանան եկեղեցում չէ, նրանք ջարդել են Քրիստոսի եւ Մարիամ Աստվածածնի արձանիկները եւ եկեղեցու այլ իրեր: Եկեղեցու սպասավորները փակել են դուռը եւ ոստիկանություն կանչել:
Հարցաքննության ժամանակ նրանք ասել են, որ հարձակումը գործել են ոգեւորված` Ստամբուլի «Ակոս» թերթի հայազգի խմբագրապետ Հրանտ Դինքին սպանած Օգյուն Սամաստի գործողությամբ: «Մենք էլ ցանկացանք հանրահայտ դառնալ, որպեսզի գնահատանքի արժանանանք», -ասել են նրանք:
16.12.2011
Armenpress.am
Leave a Reply