Թուրքիայում սպանված հայ զինվորի ծնողները պնդում են, որ իրենց որդուն սպանել են հայ լինելու համար

Թուրքիայի Բաթման նահանգի Քոզլուք շրջանի զորամասում 2011-ի ապրիլի 24-ին սպանված ստամբուլահայ Սեւակ Շահին Բալըքչըի ծնողները հերթական դատից առաջ կրկին պնդում են, որ իրենց որդուն սպանել են ազգայնականության հողի վրա:

Թուրքական Milliyet-ի թղթակցի հետ զրույցում Սեւակի ծնողները նշում էլ են, թե իրենց որդու սպանությունից 7,5 ամիս է անցել, սակայն իրենք չեն ստացել բազմաթիվ հարցերի պատասխաններ, իսկ որդուն սպանողին ազատ արձակելն ավելի է ծանրացրել իրենց վիշտը:

Սեւակի ծնողները համոզված են, որ իրենց որդուն սպանել են հայ լինելու համար եւ արդարություն են պահանջում: Մայրը հիշեցնում է, որ փորձում էին ասել, թե իր որդին եւ Քվանչ Աղաօղլուն մոտ ընկերներ են եղել, սակայն ինքը որդուց երբեք Քվանչի անունը չի լսել: «Քվանչի անտակտ արտահայտությունների համար հազիվ ինձ զսպեցի, որ նրան չապտակեմ: Ինչպիսի խիզախությամբ էր նա խոսում: Կարծես, հպարտ լիներ: Հիմա նա ազատ է արձակված եւ ուտում, խմում ու զբոսնում է»,-ասել է Անի Բալըքչըն:

Նշենք, որ Սեւակի զորացրմանը մնացել էր 23 օր։  Ապրիլի 24-ի առավոտյան նա սպանվել է մեկ այլ զինծառայող` Քվանչ Աղաօղլուի կողմից: Սպանության հետ կապված ժանդարմերիան հայտարարել է, որ սպանությունը տեղի է ունեցել ծառայակից ընկերոջ հետ կատակ անելու ժամանակ, իբր, պատահաբար արձակված կրակոցից։ 

Դատարանը հենց առաջին դատական նիստին ազատ է արձակել Քվանչ Աղաօղլուին` նշելով, թե նա փախչելու առիթ չունի: Դիարբեքիրի զինվորական դատարանում բարձրաստիճան մի զինվորական, ում անունը չի նշվում,  հայտարարել է, թե Սեւակի սպանությունից հետո  ականատես մի զինվոր մոտեցել է  իրեն` ասելով, թե Քվանչ Աղաօղլուն Սեւակին ասել էր. «Թմբլիկ, քեզ սպանելու եմ»:  Սակայն դատին ներկա մյուս զինվորականները հերքել են այս խոսքերը:

Ռազմական դատախազության կողմից պատրաստված մեղադրականում Քվանչ Աղաօղլուի համար պահանջվում է ընդամենը 9 տարվա ազատազրկում՝ «անփութության հետեւանքով մարդ սպանելու համար»:

Հերթական դատական նիստը տեղի կունենա դեկտեմբերի 16-ին: 

 http://news.am/arm/news/85888.html