Թուրքիայի խորհրդարանը որոշել է դեկտեմբերի 18-ին ներկայացուցչական պատվիրակություն ուղարկել Փարիզ` Ֆրանսիայի խորհրդարանում դեկտեմբերի 22-ին քվերակության դրված Հայոց ցեղասպանության ժխտումը քրեականացնող օրինագծի ընդունումը կանխելու նպատակով: Թուրքայի խորհրդարանական պատվիրակությունը կգլխավորի արտաքին կապերի հանձնաժողովի նախագահ Վոլքան Բոզքիրը: Այս մասին, ինչպես հաղորդում է «Արմենպրես»–ը, հայտնում են թուրքական ԶԼՄ-ները:
«Մենք Ֆրանսիայի խորհրդարանի նախագահին կհանձնենք մեր խորհրդարանի նախագահի նամակը: Հանդիպումների արդյունքում գուցե ստացվի կանխել հայկական օրինագծի ընդունումը: Մենք փորձելու ենք Ֆրանսիայի հանրությանը ներկայացնել օրինագծի ընդունման` թուրք-ֆրանսիական հարաբերությունների համար վտանգավոր հետեւանքները», -թուրքական ԶԼՄ-ներին ասել է Վ.Բոզքիրը:
Օրինագծով 1 տարի ազատազրկում եւ 45 հազար եվրո տուգանքի պատիժ է սահմանվում Ֆրանսիայի տարածքում Հայոց ցեղասպանությունը ժխտողների համար:
Հատկանշական է, որ անգամ թուրք վերլուծաբանները գտնում են, որ հայկական օրինագծի ընդունման հավանականությունը Ֆրանսիայի խորհրդարանում շատ մեծ է, որովհետեւ Թուրքիան այն կանխելու ոչ մի լուրջ լծակ չունի ձեռքում:
15.12.2011
Armenpress.am
Leave a Reply