Թուրքիայի մեջլիսի նախագահը նամակ է հղել Ֆրանսիայի իր գործընկերոջը` հայկական բանաձևը չընդունելու հորդորով

Թուրքիայի ազգային մեծ ժողովի (ԹԱՄԺ-TBMM) նախագահ Ջեմիլ Չիչեքը, ըստ “CnnTurk” լրատվական ծառայության, նամակ է հղել Ֆրանսիայի խորհրդարանի նախագահին` անհանգստություն հայտնելով Ֆրանսիայի խորհրդարանի օրակարգում ներառված Հայոց ցեղասպանությունը հերքումը քրեականացնող օրինագծի կապակցությամբ:

Վկայակոչելով անանուն դիվանագիտական աղբյուրներ` թուրքական լրատվամիջոցը տեղեկացնում է, որ հիշյալ նամակում Չիչեքն ընդգծել է թուրք-ֆրանսիական հարաբերությունների վրա կործանարար այն ազդեցությունը, որն ախուսափելիորեն հաջորդելու է օրինագծի ընդունմանը: Օրենքի այդ նախագծի համաձայն` Հայոց ցեղասպանության ժխտումը հանցագործություն է, և ժխտողների համար սահմանվում է 45.000 եվրո տուգանք` մեկ տարի ազատազրկմամբ:

Թուրքիայի օրենսդիրի ղեկավարը Ֆրանսիայի իր պաշտոնակցին հորդորել է չմիջամտել այն հարցերում, որոնք պատմաբանների ու հետազոտողների գործը պետք է լինի:

Հիշեցնենք, որ Ֆրանսիայի սենատի իրավական հարցերով հանձնաժողովը դեկտեմբերի 7-ին ընդունել էր Մարսելը ներկայացնող պատգամավոր Վալերի Բոյերի հեղինակած` Հայոց ցեղասպանության ժխտումը քրեականացնող օրինագիծը, որը դեկտեմբերի 22-ի լիագումար նիստին դրվելու քննարկման ու քվեարկման:

http://www.panorama.am/am/politics/2011/12/14/turkey/?mid=5525765