Կարծես սովորական երևույթ է դարձել, որ երբ որևէ պետություն կամ միջազգային կազմակերպություն քննարկում կամ ընդունում է Հայոց ցեղասպանությունը դատապարտող որևէ օրինագիծ, Թուրքիայի իշխանությունները նրանց հասցեին սպառնալիքներ տեղան և հարաբերությունները խզելու վերաբերյալ հայտարարություններ անեն: Այս անգամ սպառնալիքներին միացավ զավեշտալի պիտակավորում` ուղղված Ֆրանսիային, որի Ազգային ժողովում դեկտեմբերի 22-ին կքննարկվի Հայոց ցեղասպանության ժխտումը քրեականացնող օրինագիծը:
Թուրքիայի ԱԳ նախարար Դավութօղլուն, ոչ ավել, ոչ պակաս, այս առիթով ասել է. «Միջնադարյան մտածելակերպի առկայությունը Ֆրանսիայում շատ վտանգավոր է: Եթե հայկական բանաձևն անցնի, Ֆրանսիան Եվրոպայում կդառնա միջնադարյան մտածելակերպ ներմուծող առաջին պետությունը: Դրանով Ֆրանսիան կանտեսի իր իսկ արժեքները` խոսքի և մտքի ազատությունը»: Ավելին`ֆրանսիացիներին հիշեցրել է խոսքի ազատության մասին Վոլտերի հայտնի արտահայտությունը:
Հավանաբար Դավութօղլուն այնքան է հավատացել Թուրքիայի` եվրոպական պետություն և թուրքերի` եվրոպացի լինելու հորինվածքին, որ «մոռացել է», թե նույն Վոլտերից շատ հետո իր պապերը նախամարդուն բնորոշ բարբարոսությամբ իր հայրենի հողի վրա ինչպես բնաջնջեցին մի ողջ ժողովուրդ` ոչ թե այլախոհության, այլ ընդամենը այլ լինելու պատճառով: Իսկ իրենք` պապերի արժանի թոռները, 301-րդ հոդվածով շարունակում են այլերին ու այլախոհականներին սպանել, հալածել, աքսորել կամ բանտերում անլուր տառապանքների մատնել:
Խոսքի և մտքի ազատության ահա այսպիսի դասեր Ֆրանսիային:
akunq.net
Leave a Reply