ՀՅԴ Հայ դատի եւ քաղաքական հարցերի պատասխանատու Կիրո Մանոյանի կարծիքով, Ֆրանսիայի դիվանագետների երբեմն դրսեւորվող «,թուրքահաճո,, վարքագիծը չի խանգարի, որպեսզի Ֆրանսիայի խորհրդարանը մոտակա ժամանակներս ընդունի Հայոց Ցեղասպանությունը քրեականացնող օրենքը։
Հիշեցնենք, որ Ֆրանսիայի Հայ դատի գրասենյակը դիմել է Ֆրանսիայի ԱԳՆ-ին` պահանջելով հանդիպում նախարար Ալեն Ժյուպեի հետ, որպեսզի նա պարզաբանումներ տա վերջին շրջանում իր եւ ԵԱՀԿ Մինսկի խմբի նախկին համանախագահ Բեռնար Ֆասյեի որոշ հայտարարությունների վերաբերյալ:
Մասնավորապես, դեկտեմբերի 8-ին ադրբեջանական կազմակերպությունների նախաձեռնած հանդիպման ընթացքում Ֆասյեն խոսել է «ադրբեջանցիների ցավից»։ «Ես, որպես ֆրանսիացի, լավ գիտեմ, թե ինչ է նշանակում օկուպացիա»,-ասել է նա։
«Ա1+»-ի հետ զրույցում Կիրո Մանոյան նշեց, որ Ցեղասպանությունը քրեականացնող օրինագծի ընդունմանը Ֆրանսիայում այժմ սատարում են են թե՛ նախագահ Սարկոզիի գլխավորած գործադիր իշխանությունը, թե՛ Սենատի հիմական ուժերը։
Բացի դրանից, ըստ նրա, օրինագծի վերաբերյալ մոտեցումն այսօր փոքր-ինչ այլ է։ «Մի քանի տարի առաջ Եվրամիությունն ընդունեց այլատյացությունը դատապարտող շրջանակային համաձայնագիր,որը պարտավորեցնում է անդամ-պետություններին՝ համապատասխանեցնել իրենց օրենսդրությունը դրանում արտացոլված դրույթներին, այն է՝ պատժել մարդկության դեմ իրագործված հանցագործությունների փաստը ժխտողներին, նվաստացնողներին ու ծաղրողներին»,- տեղեկացրեց Կիրո Մանոյանը։
Նրա կարծիքով, այս համատեքստում մոտակա տարիներին Մեծ Եղեռնի փաստը ճանաչած ԵՄ երկրները նույնպես կքրեականացնեն Ցեղասպանության ժխտումը։
Պարոն Մանոյանը տեղեկացրեց նաեւ, որ մինչեւ տարեվերջ ԱՄՆ Կալիֆոռնիայի 9-րդ Վերաքննիչ ատյանը լրիվ կազմով կքննի Ցեղասպանությունից տուժած հայերի՝ապահովագրական գումարներ ստանալու իրավունքը վերականգնելու հարցը։
Հիշեցնենք, որ 2010-ին ԱՄՆ Դաշնային դատարանը հակասահմանադրական էր ճանաչել 2000-ից սկսած նմանատիպ բողոքներով հայցերի բավարարումը՝ պատճառաբանելով, թե «նահանգային դատարանը միջամտում է դաշնային իշխանություններին վերապահված արտաքին քաղաքական հարցերին, իսկ դաշնային կառավարությունը Ցեղասպանությունը չի ճանաչել» ։
«Հայտնի է, որ ԱՄՆ 43 նահանգներ վաղուց ի վեր ընդունել են Ցեղասպանության փաստը, եւԴաշնային իշխանությունը երբեք չի դժգոհել դրա դեմ։ Այդ պատճառով մի քանի նահանգների իշխանություններ պնդում են, որ պետք է հնարավորություն տալ Եղեռնից տուժած հայերի ժառանգներին՝ վերադարձնելու իրենց ունեցվածքը..», – նշեց պարոն Մանոյանը։
Նա նաեւ ոջունեց Թուրքիայում քրիստոնյաների կրոնական իրավունքները վերականգնելու կոչով նախօրեին Սենատում ընդունված 306 բանաձեւը։ «Այս բանաձեւով Ամերիկայի օրենսդիր իշխանությունը Անկարային ուղերձ է հղում, որ այսուհետեւ հետամուտ է լինելու ոչ միայն Ցեղասպանության փաստի ճանաչմանը, այլեւ դրա հետեանքների վերացմանը՝ պահանջելով Թուրքիայի տարածքում մնացած եկեղեցիներն ու այլ գույքը վերադարձնել իրենց իսկական տերերին»-, նշեց նա։
Leave a Reply