Վանը պետք է տեղափոխվի այլ վայր

Վանի Յուզյունջյու յըլ համալսարանի ճարտարապետաշինարարական ֆակուլտետի պրոֆեսոր Ահմեդ Համդի Օրհանը հայտարարել է, որ Վանի տեղանքը գտնվում է անընդհատ շարժվող երկրաշարժային ճեղքվածի վրա եւ անհրաժեշտ է քաղաքը տեղափոխել այլ վայր: 

Ինչպես հաղորդում է «Արմենպրես»–ը, թուրքական «Սոնդաքիքա» լրատվական կայքի հետ զրույցում նշելով, որ 1881-ից սկսած` Վանում յուրաքանչյուր 35 տարին մեկ ավերիչ երկրաշարժեր են տեղի ունեցել, թուրք պրոֆեսորն ասել է. «Եթե քաղաքը կրկին նույն տեղում կառուցվի, ապա ապագայում մարդկային եւ նյութական կորուստներն անխուսափելի կլինեն: Ներկայում Վանի երկրակեղեւը մշտապես շարժման մեջ է: Այդ պատճառով առաջարկում ենք Վանը տեղափոխել Էդրեմիտ ավանի հետեւի մասում գտնվող Էրդեմ քաղաք կոչված հարթավայր: 1881-ին Վանի ամրոցի շրջակայքում գտնվող Վան քաղաքն ամբողջությամբ ավերվել է, ինչի պատճառով Վանը տեղափովվել է վերեւ: Նույնը կրկնվել է նաեւ 1945-ին: Վանում 7.2 մագնիտուդով երկրաշարժ է տեղի ունեցել նաեւ 1976-ին, ինչը հազարավոր մարդկանց կյանք է խլել: Եթե այժմ եւս քաղաքը կառուցվի նախկին տեղում, ապագայում երկրաշարժերը մեծ կորուստներ կպատճառեն մարդկանց», – հայտարարել է թուրք պրոֆեսորը:

12.12.2011

Armenpress.am