Բացահայտվել է ևս մեկ պետական գաղտնիք Թուրքիայում, երբ 1976թ-ի դեկտեմբերի 12-ին Թուրքիայի Ազգային անվտանգության խորհուրդը կառավարությանն է ներկայացրել մի զեկույց, որտեղ առաջարկվել է քուրդ ընտանիքների համար «երեք երեխայի դեպքում պատիժ» սահմանել: «Քուրդ –զեկույց» անվանումով այս վերլուծությունում նշվել է, որ եթե 2010 թվականին քրդերը կկազմեն Թուրքիայի բնակչության 40 տոկոսը (ներկայում այդպես էլ կա), ապա 2025 թվականին նրանք կկազմեն արդեն 50 տոկոսը և կարող են մեծամասնություն կազմել Թուրիքայի Միլլի Մեջլիսում, եզրակացրել են զեկույց կազմողները: Թուրքիայի Ազգային անվտանգության խորհուրդը մտահոգություն է հայտնել, որ Միլլի Մեջլիսում մեծամասնություն ունենալու դեպքում քրդերը կարող են փոխել Սահմանադրությունը:
Հիշեցնենք, որ Թուրքիայի Ազգային անվտանգության խորհրդում այն ժամանակ ձևավորվում էր բացառապես զինվորականներից:
Ինչպես թուրքական «Ռադիկալ» թերթին հայտնել է այդ տարիների պետական նախարար Սալիմ Ենսարիօղլուն, ինքը լավ է հիշում, թե ինչ էր գրված այդ զեկույցում, և ինչպես էր առաջարկվում կառավարությանը պատիժ սահմանել երեք և ավելի երեխա ունեցող քուրդ ընտանիքների համար, որպեսզի քուրդ ազգաբնակչությունը չաճի: Պետական նախարարը հիշում է, որ վարչապետ Էրբականը մի կողմ է նետել զեկույցը և հայտարարել, որ ինքն այսպիսի զեկույց չի հաստատի, քանի որ, ըստ նրա, պետությունն ինքն իր ձեռքով ուզում է երկիրը մասերի բաժանել:
Հավելենք, որ Թուրքիայում դեմոգրաֆիկ իրավիճակը փոխվում է ոչ միայն քուրդ ազգաբնակչության բնական աճի շնորհիվ, այլ նաև նրա հաշվին, որ շատ ընտանիքներ արդեն հրաժարվում են իրանց թուրք համարել և ետ են գնում դեպի իրենց արմատները: Դերսիմի դեպքերի մասին ազատ քննարկումներն արդեն բերել են նրան, որ որոշ թուրքական լրատվամիջոցներում ալևիների և զազաների քանակն արդեն նշվում է 20 մլն և ավելի: Այս պարագայում ոչ թե 2025-ին, այլ ավելի շուտ քուրդ ազգաբնակչությունը կարող է երկրում կազմել մեծամասնություն:
Armweeklynews.am 12.12.11
Leave a Reply