Ալի Էրթեմի արձագանքը

Ալի Էրթեմ

Ներկայացնում ենք Միություն՝ ընդդեմ ցեղասպանության կազմակերպության նախագահ Ալի Էրթեմի արձագանքը Միքայել Ասլանի հետ մեր հարցազրույցին, որին կարող եք ծանոթանալ

հայերեն http://akunq.net/am/?p=15178

և թուրքերեն http://akunq.net/tr/?p=10408 լեզուներով: 

Նրանք, ովքեր ի խորոց սրտի են զգում ցեղասպանությանը զոհ գնացած ժողովուրդների ցավերը, նույնչափ անխախտելի և վեհ հավատք են ունենում խաղաղության և ժողովուրդների բարեկամության հանդեպ: Միքայել Ասլանը, ով կյանք է մտել` դեռ մանկական տարիքում տեսնելով և մինչև ծուծը զգալով ճնշման, բռնապետության, ցեղապաշտական կանխակալ կարծիքների չարիքը, շատ արագ է նկատել այն աղետները, որ եկել են իր պապերի գլխին: Նա ևս, ճիշտ այնպես, ինչպես Դերսիմի մյուս երեխաները, մեծացել է թե’ հայ ժողովրդի և թե’ ղըզըլբաշ ալևիների դառը կյանքի պատմություններով:

Մեկ տիպի մարդ, հոմոգեն ազգ ստեղծելու հիստերիայով իրենց թրերի սրությունը Դերսիմի ալևիների կոկորդին փորձած Իթթիհադի վաստակավոր մարդասպանները, երբ պայթեց 1937 թ. աշխարհակործանումը (կարծես բավական չէին այն տասնյակ հազարավոր անմեղների առնված հոգիները), նաև ասում էին. «Հանձնելու եք այն հայերին, որոնց թաքցրել եք»: Միքայելը չհապաղեց ըմբռնել, որ իր պապերը հատկապես պատժվել են, քանի որ ժամանակին թև ու թիկունք են եղել հայերին, և որ 1937-38 թվականները եղել են 1915-ի անմիջական շարունակությունը:

Միքայելը մարդկային հսկայական մեղքերին քեն ու ատելություն հակադրելու, հասարակայնությանը ցեղասպանությունները դատապարտելու և դրանց արգելք լինելուն համոզելու ուղին որոնեց Վիլիամ Շեքսպիրի փիլիսոփայության մեջ: Հավատաց, որ միլիոնների համար երգ ստեղծողները շատ ավելի ուժեղ են օրենք հրապարակողներից ու կոտորած անողներից, որոնք դա անում են` հանուն մի բուռ ընչաքաղց բռնակալների շահերի:

Միքայելը յուրացրեց, որ ժողովուրդների ըմբոստություններում, սերերում, կարոտներում թորված տիեզերական երաժշտությունը, որը սահման չի ճանաչում, դարձյալ նրանց միջև ամենաբարեկամական կապ հաստատելու միջոց է: Դրա համար էլ հենց նրան տրվեց Արարատի երկու կողմերի միջև բարեկամության կամուրջ կառուցելու պատիվը: Ես ի սրտե հավատում եմ, որ նա ըստ արժանվույն իրականացրել է այդ շատ դժվար, բայց նույնքան էլ պատվաբեր պարտականությունը:

Ես անկեղծորեն շնորհավորում եմ Միքայելի խմբին և սիրելի Միքայելին, որի սիրտը բաբախում է մարդկության, իրավունքի և արդարության համար: Հազար անգամ շնորհակալություն եմ հայտնում Միքայելին ու հանուն իրավունքի և արդարության ճանապարհ ընկած զազա, քուրդ, թուրք և այլ ազգությունների անկեղծ մարդկանց բարեկամությանը ձեռք մեկնած հայ ժողովրդին, արվեստագետներին, իրավասու անձանց:

06.12.2011

Akunq.net