Տարիներ շարունակ Թուրքական պատմագիտական ընկերության նախագահը եղած դոկտոր, պրոֆ. Յուսուֆ Հալաչօղլուն ուշադրություն է հրավիրել այն հանգամանքի վրա, որ վարչապետ Էրդողանի` Դերսիմի կոտորածների կապակցությամբ խնդրած ներողությունը կարող է նախադեպ դառնալ հայերի համար: Հալաչօղլուն նաև նախազգուշացրել է, թե առաջիկայում հայկական սփյուռքը, այդ ներողությունը որպես նախադեպ ընկալելով, կարող է հանդես գալ Հայոց ցեղասպանության համար ներողության և փոխհատուցման պահանջով:
Դերսիմյան քննարկումների կապակցությամբ «Յենիչաղ» թերթին հարցազրույց տված Հալաչօղլուն, հիշեցնելով վարչապետ Էրդողանի` «Հայկական հարցը թողնենք պատմաբաններին» խոսքի մասին, նշել է. «Նման հայտարարությամբ հանդես եկած վարչապետի կողմից Դերսիմի խնդիրը պատմաբաններին չթողնելու ցանկությունն անհասկանալի է: Էրդողանը, իրավական առումով, իրավասու չէ ներողություն խնդրելու, որովհետև Դերսիմի կապակցությամբ գործողություններ անելու որոշումը կայացրել է Թուրքիայի Ազգային մեծ ժողովը, այսինքն` այն ժողովրդի կամքն է եղել: Վարչապետը չի կարող դրա համար ներողություն խնդրել, քանի որ այդպիսով ոտնակոխ է անում ժողովրդի կամքը: Բացի այդ, խոսքը գնում է նաև Սեյիթ Ռըզայի` դատարանում տված այն ցուցմունքներին, որոնք վերաբերում են իրադարձությունների անդրկուլիսային հատվածին: Սեյիթ Ռըզան դատարանում հայտնում է, թե իրենց կողքին ռուս հրամանատարներ են գտնվել: Դարձյալ նույն ժամանակաշրջանում Ֆրանսիան Թուրքիայի դեմ պայքար էր մղում` հանուն Հաթայի: Չի կարելի մեկնաբանություններ անել` առանց սույն դեպքերի հետ անգլիական, ֆրանսիական և ռուսական առնչությունները հաշվի առնելու: Առանց խորհրդարանային և դատական նիստերի արձանագրություններն ու Գլխավոր շտաբի արխիվները լիովին ուսումնասիրելու` մեկնաբանություններ անելը վնասում է Թուրքիային»:
03.12.2011
Akunq.net
Leave a Reply