Հրանտ Դինքի սպանության գործով կարող են նոր կասկածյալներ ի հայտ գալ

Հրանտ Դինքի սպանության գործով դատարանը սկսել է ուսումնասիրել Ագոս թերթի խմբագրատան շրջակայքից 2007թ-ի հունվարի 19-ին ժամը 11.10-ից մինչև ժամը 11.25-ը և ժամը 14.45-ից մինչև 15.00 ընկած ժամանակահատվածում կատարված հեռախոսազանգերը:

Հեռախոսազանգեր են գրանցել թուրքական բջջային կապի օպերատորներ Turkcell, Vodafone և Avea ընկերությունները: Այս մասին տեղեկացնում է Դողան գործակալությունը:

 Կապի օպերատորները ներկայացրել են իրենց 18 բջջային կապի աշտարակներում գրանցված զանգերը: Այժմ դատարանը հնարավորություն ունի ստուգելու թե դեպքի վայրից ով և ինչ համարով է զանգահարել և ինչ համարներից է զանգ ընդունել:

Հիշեցնենք, որ Դինքի ընտանիքի փաստաբանները դիմել էին դատարան՝ սպանության օրը Ագոս թերթի խմբագրության շրջակայքում գրանցված բոլոր հեռախոսազանգերը դատարան ներկայացնելու պահանջով: Դատարանը դիմել էր Թուրքիայի կապի և հեռահաղորդակցության կոմիտե, սակայն կոմիտեն մերժել էր դատարանի խնդրանքը այն պատաճառաբանությամբ, որ դա կարող է մարդու մասնավոր կյանքի գաղտնիքի խախտում դիտարկվել: Մեկ տարի շարունակ կոմիտեն չէր տրամադրում այդ տվյալները, և ահա, վերջապես, տվյալներն ուղարկվել են դատարան: Սա շատ կարևոր հանգամանք է Հրանտ Դինքի սպանության դատավարության ընթացքում, քանի որ 2012թ. հունվարին կոմիտեի գիտությամբ օպերատորները պարտավոր էին ջնջել հեռախոսազանգերի գրանցված տվյալները:

Թուրքիայում գործող կարգի համաձայն՝ դրանց պահպանման ժամկետը հինգ տարի է:

Armweeklynews.am