Եդեսիա (Ուրֆա) նահանգի Կամուրջ (թուրքական անվանումը` Գերմյուշ, ներկայիս անվանումը` Դաղէթեղի) հայկական գյուղը

Վերջերս թուրքական լրատվամիջոցները, մասնավորապես` http://www.haber7.com լրատվական կայքը հաղորդեցին, թե Թուրքիայի նախարարների խորհրդի որոշմամբ` Շանլըուրֆա (Ուրֆա/Եդեսիա) նահանգի Գերմյուշ (ներկայիս անունը` Դաղէթեղի) գյուղը և տեղի եկեղեցին հռչակվել են զբոսաշրջության կենտրոն (տե’ս Akunq-ի հրապարակած «Ուրֆայի (Եդեսիա) հայկական գյուղերից մեկը և տեղի եկեղեցին բացվել են զբոսաշրջիկների առաջ» լուրը): Հրապարակման մեջ նշվում էր նաև, թե սույն որոշումը կայացվել է Թուրքիայի մշակույթի և զբոսաշրջության նախարարության առաջարկի հիման վրա, իսկ Թուրքիայի նախարարների խորհրդի ընդունած համապատասխան որոշումը` հրապարակվել պետական պաշտոնաթերթ «Ռեսմի գազեթե»-ի 2011 թ. հոկտեմբերի 23-ի թիվ 28093 համարում:

Նշենք, որ խոսքը Կամուրջ գյուղի մասին է, որը գտնվել է Եդեսիա քաղաքից 6 կմ հյուսիս-արևելք: Այն հնում նաև հիշատակվել է որպես քաղաք: Կամուրջը 19-րդ դարի վերջերին ունեցել է 400 տուն հայ բնակիչ: Գյուղում եղել են 3 առուներ` Դշխոյի ջուրը, Թագուհու ջուրը և Սուրբ Գևորգի ջուրը: Կամուրջ գյուղում են գտնվել Սուրբ Աստվածածին (1881 թ.) և Սուրբ Թադևոս եկեղեցիները, որոնցից վերջինը նաև վանք է համարվել: Այստեղ եղել է վարժարան` 115-120 սաներով: Գյուղի տարածքում գտնվել են նաև այլ վանքերի, մատուռների փլատակներ, ինչպես նաև` մի հին գերեզմանոց: Ըստ ավանդության` Կամուրջը հիմնադրվել է Արշամի որդի Աբգար թագավորի կողմից: Գյուղի ամբողջ բնակչությունը տեղահանվել է 1915 թ.` Հայոց ցեղասպանության ժամանակ: Կամուրջի բնակիչների մեծ մասը զոհ է գնացել թուրքական յաթաղանին:

02.12.2011

Akunq.net