«Թո’ղ Զարաքօլուն անմիջապես ազատ արձակվի». պահանջում է «Ձերբակալված լրագրողների հետ համերաշխության պլատֆորմ»-ը

«Ձերբակալված լրագրողների հետ համերաշխության պլատֆորմ»-ը հանդես է եկել ձերբակալված հրատարակիչ, գրող, մարդու իրավունքների պաշտպան Ռագըփ Զարաքօլուին անմիջապես ազատ արձակելը պահանջող հայտարարությամբ:

Այդ մասին հաղորդում է թուրքական «Աչըք գազեթե» անկախ պարբերականը: Աղբյուրի համաձայն` «Ձերբակալված լրագրողների հետ համերաշխության պլատֆորմ»-ի տարածած հայտարարության մեջ ասվում է.

«Ձերբակալվել է հրատարակիչ, գրող, մարդու իրավունքների պաշտպան Ռագըփ Զարաքօլուն

KCK-ի (Քուրդիստանի հասարակությունների միություն) անվան տակ Ստամբուլում իրականացվող գործողությունների շրջանակներում ձերբակալվել է նաև հրատարակիչ, գրող Ռագըփ Զարաքօլուն: Հոկտեմբերի 4-ին, դարձյալ նույն գործի շրջանակներում, 97 հոգու հետ մեկտեղ ազատազրկվել էր նաև գիտնականի որդին` Դենիզ Զարաքօլուն:

Ռագըփ Զարաքօլուն մեր այն մտավորականներից է, ով լավ ճանաչված է թուրքական և համաշխարհային հասարակայնության կողմից, և արժանացել է բազմաթիվ մրցանակների: Նա միևնույն ժամանակ Թուրքիայի հրատարակիչների միության հրատարակման ազատության կոմիտեի նախագահն է և «Բելգե» հրատարակչատան տնօրենը: Նաև Մարդու իրավունքների միության հիմնադիրների շարքում է եղել: Որպես սյունակագիր է հանդես գալիս այնպիսի թերթերում, ինչպիսիք են «Օզգյուր գյունդեմ»-ը և «Էվրենսել»-ը: Զարաքօլուի դեմ հարուցվել են բազմաթիվ դատական գործեր, որոնցից մի քանիսը դեռ ընթացքի մեջ են: Նա կանոնավոր կերպով մասնակցում է այդ դատական նիստերին: Եթե դատախազությունը կանչեր` ցուցմունք տալու, կգնար ու կտար: Ռագըփ Զարաքօլուն միտումնավոր կերպով է ձերբակալվել: Սույն ազատազրկման նպատակն է` ի դեմս Ռագըփ Զարաքօլուի ահաբեկել և լռեցնել մեր մտավորականներին, բոլոր մտածող մարդկանց, մամուլի, մտքի և խոսքի ազատության, մարդու իրավունքների պաշտպաններին, առաջադեմ հասարակայնությանը: Դոկտոր, պրոֆեսոր Բյուշրա Էրսանլըի ազատազրկումը ևս միևնույն նպատակն է հետապնդում:

Վարչապետ Ռեջեթ Թայիփ Էրդողանի գրպանում գտնվող ցուցակը, որում ներառված են այն 1400 հոգին, ովքեր պետք է ձերբակալվեն, սկսում է խմբակային կերպով կյանքի կոչվել` «Ահաբեկչության դեմ պայքարի» մասին օրենքի շրջանակներում, օրենք, որին ընդդիմադիր ուժերը տվել են «հասարակության դեմ պայքարի օրենք» անվանումը: Սկսվել է «անդադար որսը»:

Մենք, որպես «Ձերբակալված լրագրողների հետ համերաշխության պլատֆորմ»-ի ներկայացուցիչներ, մեր բողոքն ենք արտահայտում Ռագըփ Զարաքօլուի և Բյուշրա Էրսանլըի ձերբակալման կապակցությամբ և պահանջում, որ նրանք անմիջապես ազատ արձակվեն»:

31.10.2011

Akunq.net