Հայոց ցեղասպանության ճանաչման եւ ապրիլի 24-ն Իսրայելում որպես ցեղասպանության զոհերի հիշատակի օր հռչակելու վերաբերյալ բանաձեւերի քննարկումներն Իսրայելի խորհրդարանում տեղի կունենան առաջիկա շաբաթների ընթացքում: Այս մասին «Արմենպրես»-ին տեղեկացրեց Երուսաղեմի Հայ դատի հանձնախմբի պատասխանատու Հակոբ Սեւանը’ նշելով, որ երկար արձակուրդից հետո միայն այսօր է Կնեսեթը վերսկսել իր աշխատանքները: Նա նաեւ նշեց, որ Հայ դատի հանձնախմբի ներկայացուցիչներն առաջիկա օրերին հանդիպումներ են ունենալու Կնեսեթի որոշ պատգամավորների հետ’ քննարկելու համար այդ բանաձեւերի ճակատագիրը:
Ինչպես ավելի վաղ տեղեկացրել էր «Արմենպրես»-ը, հունիսին տեղի ունեցած քննարկումների արդյունքում որոշում էր ընդունվել ապրիլի 24-ը որպես Հայոց ցեղասպանության զոհերի հիշատակի օր սահմանելու մասին բանաձեւը հետագա քննարկումների համար Կնեսեթի Կրթության եւ մշակույթի հանձնաժողով տեղափոխելու մասին: Ակնկալվում է, որ նույն հանձնաժողովում պետք է քննարկվի նաեւ Հայոց ցեղասպանության ճանաչման բանաձեւը:
Հիշեցնենք, որ Հայոց ցեղասպանության ճանաչման հարցն այս տարվա մայիսին Կնեսեթի կրթության եւ մշակույթի հանձնաժողով էր ներկայացրել ձախակողմյան «Մերեց» կուսակցությունը, որին աջակցել է Իսրայելի վարչապետ Բենիամին Նեթանյահուի գլխավորած «Լիկուդ» կուսակցությունը: Հայոց ցեղասպանության ճանաչումը քննարկելու պահանջը խորհրդարանական հանձնաժողովում հավանության էր արժանացել ձայների մեծամասնությամբ: Մինչ կրթության հանձնաժողով ուղարկելը, Կնեսեթի նիստում բոլոր պատգամավորները, այդ թվում’ խորհրդարանի նախագահը, պաշտպանել են քննարկումները շարունակելու որոշումը’ ընդգծելով, որ Թուրքիայի հետ Իսրայելի հարաբերությունները չպետք է Հայոց ցեղասպանությունը չճանաչելու պատճառ դառնան:
31 Հոկտեմբեր, 2011
ԱՐՄԵՆՊՐԵՍ
Leave a Reply