Վանի շրջակայքում հոկտեմբերի 23-ին տեղի ունեցած 7.2 մագնիտուդ ուժգնությամբ երկրաշարժից տուժած բնակչությունը հեռանում է: Այս մասին, ինչպես հաղորդում է «Արմենպրես»-ը, հայտնում է թուրքական «Միլիեթ» թերթը:
Թերթը նշում է, որ սկսված ձմեռվա պատճառով, վրաններում տեղավորված եւ տանիք ունենալու հույսը կտրած մարդիկ փլատակների միջից հանած իրենց իրերը բարձում են բեռնատար ավտոմեքենաները եւ հեռանում’ իրենց հարազատների եւ բարեկամների մոտ ապաստան գտնելու համար: Բնակիչները գտնում են, որ անհնարին է ձմեռն անցկացնել վրաններում: Վանում բնակարանների վարձակալման գինը նվազագույնը 30 տոկոսով բարձրացել է: Շրջանի տարածքում մեծ թվով դպրոցի շենքեր ավերվել են:
Թերթը գրում է, որ պաշտոնապես մոտ 370 հազար բնակչություն ունեցող Վանից հեռանում են նաեւ տները չավերված բնակիչները: Նրանք գտնում են, որ հոգեբանական տեսակետից’ այլեւս չեն կարող մնալ քաղաքում եւ երեխաներին ուղարկել երկրաշարժից վնասված դպրոցներ: Նշվում է, որ Վանի շրջակայքի շատ բնակիչներ արտագաղթում են Իրան:
31 Հոկտեմբեր, 2011
Արմենպրես
Leave a Reply