Թուրքիայում որոշել են ֆիլմ նկարահանել հայերի և Պոնտոսի հույների ցեղասպանություններն իրականացնողներից Թոփալ Օսմանի մասին

Թուրքիայում որոշել են ֆիլմ նկարահանել հայերի և Պոնտոսի հույների ցեղասպանություններն իրականացնողներից մեկի` կերասունցի (գիրեսունցի) Օսման աղայի մասին, որը պատմությանն առավելապես հայտնի է Թոփալ Օսման անունով: Այդ մասին հաղորդում է թուրքական «Զաման» պարբերականը` հղում անելով թուրքական պետական «Անադոլու» գործակալության` Գիրեսունից փոխանցած տեղեկությանը: Ըստ աղբյուրի`  ֆիլմի նկարահանումները մեկնարկելու են սույն թվականի նոյեմբերի 4-ից: Ֆիլմի նկարահանման համար հատկացվել է 2 միլիոն թուրքական լիրա: Դերասանական կազմը բաղկացած է լինելու 30 հոգուց:

Նշենք, որ մինչև 1914 թ. ոչ էական մի ավազակախմբի ղեկավարը եղած Օսմանը Հայոց ցեղասպանության նախապատրաստությունների ժամանակ այդ գործում է ընդգրկվել է Հատուկ կազմակերպության (Teşkilat-ı Mahsusa) ղեկավարների կողմից: Օսմանն ստանձնել է Սևծովյան շրջանը հայերից մաքրելու գործը: Բանտերից ազատված մարդասպաններից բաղկացած իր ավազակախմբով նա մասնակցել է Արդվինում և շրջակայքում գործադրվող «տեղահանությանը» և սպանել բազմաթիվ հայերի:

1919 թ. Հայոց ցեղասպանության կապակցությամբ Ստամբուլի ռազմական ատյանի կողմից հետաքննության մեջ գտնվող Թոփալ Օսմանը Հավզայում հանդիպել է շատ կարճ ժամանակ առաջ Սամսուն ժամանած Մուստաֆա Քեմալի հետ: Այդ հանդիպումից հետո սուլթան Վահիդեդդինը չեղյալ է հայտարարել Թոփալ Օսմանին ձերբակալելու հրամանը. Օսմանը դարձել է Ազգային իրավունքի պաշտպանության կազմակերպության (Muhafaza-i Hukuk-u Milliye Cemiyeti) Գիրեսունի մասնաճյուղի նախագահը: Այս նոր կարգավիճակում հաջողությամբ իրականացրել է Մուստաֆա Քեմալի ընդդիմադիրներին ճնշելու գործը, որից հետո` անցել իր մյուս պարտականությունն իրագործելուն. այն է` զտել Սևծովյան շրջանը հույներից:  Թոփալ Օսմանը Պոնտոսի հույներին կոտորել է այնպիսի աներևակայելի չարչարանքներով և խոշտանգումներով, ինչպես, օրինակ, ողջ-ողջ թաղել իրենց իսկ փորած գերեզմաններում, հրկիզել նրանց շոգենավների կաթսաներում կամ մաշկազերծ անել: 1916-1923 թթ. Պոնտոսում սպանվել է առնվազն 60 հազար հույն:

28.10.2011

Akunq.net