Պարզվում է` Վան քաղաքը Թուրքիայի համար Սոմալիից էլ հեռու է

Մինչ օրս, հոկտեմբերի 26-ի ժամը 16.00 դրությամբ, Թուրքիայի բարեգործական կազմակերպությունները Վանի համար հավաքել են 5 մլն լիրա, իսկ մի քանի ամիս առաջ Սոմալիի բնակչության համար հավաքվել էր 526 մլն լիրա: Եթե Սոմալիի սովյալների համար դրամահավաքն անձամբ գլխավորում և կազմակերպում էր Թուրքիայի վարչապետ Էրդողանը, ապա Վանի համար բարեգործական նվիրատվությունների գործընթացը կազմակերպում են հասարակական կառույցները: Այդ մասին տեղեկացնում է Դողան գործակալությունը: Այն, որ Թուրքիան դժվարանում է օգնել Վանի անօթևան մնացած ընտանիքներին, այսօր պարզ է բոլորի համար: Թուրքական «Կարմիր մահիկի» տվյալներով` հոկտեմբերի 26-ի դրությամբ աղետյալ ընտանիքները լրացուցիչ 37 հազար վրանների կարիք ունեն: Անգամ վարչապետ Էրդողանն է խոստովանել, որ առաջին օրը փրկարարական և օգնության աշխատանքերն անհաջողության էին մատնված, սակայն դրանք հետագայում հունի մեջ մտան: Այսօր Վանի թաղապետերը մասսայաբար հրաժարական են ներկայացրել, քանի որ ժողովուրդը նրանցից, որպես տեղական իշխանության մարմիններ, օգնություն է պահանջում, իսկ Վան քաղաքին օգնություն չի հասնում: Այդ մասին տեղեկացրել է թուրքական Ռադիկալ օրաթերթը: Հնարավոր է, որ թուրքական իշխանությունները անհրաժեշտ օգնությունը ժամանակին տեղ հասցնելու համար ունեն որոշակի կազմակերպչական թերություններ, սակայն Վանի բնակչության շրջանում տարածված է այն կարծիքը, որ պետությունը միտումնավոր է ուշացնում օգնությունը, քանի որ Վանում քրդեր են բնակվում: Չի բացառվում, որ այդ լուրերը նպատակային են տարածվում: Սակայն, ինչպես պետք է գնահատի Թուրքիայի քուրդ բնակչությունն այն փաստը, որ Վանի համար հարյուր անգամ ավելի քիչ գումար է հավաքվել երեք օրում, քան ամիսներ առաջ` Սոմալիի բնակչության օգնություն հատկացնելու համար: Սա արդեն ակնառու փաստ է:    

26.10.11

Armweeklynews.am