Ակադեմիական կոնֆերանս փոխհատուցման հարցերով

Այսօր` հոկտեմբերի 27-ին Մասաչուսեթսի Քլարկ համալսարանի «Թիլտոն» դահլիճում իր աշխատանքներն է սկսելու երկօրյա ակադեմիական կոնֆերանսը, որը քննարկելու է ցեղասպանությունների զոհ դարձած ժողովուրդներին փոխհատուցում տրամադրելու հարցերը, տեղեկացնում է «Արմինյն միրոր սփեքթեյթր» շաբաթաթերթը:

Կոնֆերանսը, որը կրում է «Հայերի ցեղասպանությունից այն կողմ: Փոխհատուցման հարցը համեմատական վերլուծությամբ» խորագիրը, հովանավորում է Քլարկ համալսարանի «Ողջակիզման եւ ցեղասպանության ուսումնասիրությունների Ստրասլեր կենտրոնը»: Կազմակերպիչն է պրոֆ. Թաներ Աքչամը: Մասնակցում են «ՆԱԱՍՐ»-ի` Հայկական ուսումնասիրությունների եւ հետազոտությունների ազգային ասոցիացիայի ներկայացուցիչները եւ Էրիկ Ուայթսը` Մինեսոտայի համալսարանից: Բացման խոսքով հանդես է գալու սոցիոլոգիայի մասնագետ պրոֆ. Ջոն Տորպեյը, որը 2006-ին հեղինակել է «Ջարդվածը վերականգնել: Փոխհատուցման քաղաքականությունը» գիրքը:

Համեմատական քննարկումների ընթացքում անդրադարձ է լինելու հայկականից բացի նաեւ հրեական եւ Ամերիկայի բնիկների ցեղասպանություններին: Քննարկվելու է գերմանացիների փոխհատուցման փորձը:

Մանրամասնությունների համար այցելել www.clarku.edu կամ www.naasr.org կայքերը:

Հ. Ծ.

27-10-2011

«ԱԶԳ» ՕՐԱԹԵՐԹ #192